«Nazarbaev Zııatkerlik mektepteriniń» emtıhan materıaldaryn satý týraly habarlama – feık
Bul týraly óziniń Facebook paraqshasynda «Nazarbaev Zııatkerlik mektepteri» derbes bilim berý uıymdary (DBBU) Basqarma tóraǵasy Ánýar Janǵozın jazdy, dep habarlaıdy QazAqparat.
«Sońǵy ýaqytta áleýmettik jeliler men messendjerlerde «Nazarbaev Zııatkerlik mektepteri» DBBU túlekteri tapsyratyn emtıhan materıaldaryn satý týraly habarlama taraýda. Bul aqparat shyndyqqa sáıkes kelmeıtinin atap ótkim keledi. Bizdiń mektepterde oqýshylardy baǵalaý rásimderin ótkizýge arnalǵan kez kelgen emtıhan materıaldary halyqaralyq standarttarǵa sáıkes ázirlenedi. Emtıhan materıaldaryn ázirleý kezinde qupııalylyq jáne aqparattyq qaýipsizdik sharalary saqtalady, bul óz kezeginde materıaldardyń taralyp ketpeýin qamtamasyz etedi»,-dep jazdy Basqarma tóraǵasy.
Osyǵan baılanysty ol «Nazarbaev Zııatkerlik mektepteri» DBBU arandatýshylyqqa berilmeýge shaqyratynyn aıtty.
«Biz oqýshylarymyzǵa bilim berýde adaldyq pen ashyqtyq prıntsıpterin qatań ustanamyz jáne alaıaqtyqtyń kez kelgen túrin, sonyń ishinde emtıhan materıaldaryn satýdy múldem quptamaımyz.
Sondaı-aq mundaı áreketter bizdiń erejelerdi óreskel buzý retinde qarastyrylatynyn, oqý ornynan/jumystan dereý shyǵarýǵa jáne keıinnen zańnamalyq deńgeıde jaýapqa tartýǵa ákelýi múmkin ekenin atap ótkim keledi»,-dedi Ánýar Janǵozın.