Nazarbaev zııatkerlik mektepteri men qarapaıym mektepti qarjylandyrýda 6 ese aıyrmashylyq bar – depýtat
«Álemdik bank zertteýi boıynsha eldegi oqýshylardyń 1 paıyzy ǵana sapaly bilim alyp jatyr. Oqýshylardyń basym bóliginiń tańdaý jasaý múmkindigi joq. Olar negizinen eki ne úsh aýysymdyq mektepterde bilim alyp jatyr. Onyń ústine, sońǵy úsh jylda elimizde 1 mln 277 myń sábı dúnıege keldi. Bul bilim salasyna túsip turǵan úlken demografııalyq salmaq. Olar úshin keleshekte kem degende 3 myń mektep salynýy kerek», - dep atap ótti depýtat Senat otyrysynda.
Álemdik banktiń zertteýinshe, qazir elimizdegi adam kapıtalynyń ındeksi 63 paıyzdy kórsetedi. Bul – ındeks bala týǵannan bastap 18 jasqa deıingi qalyptastyrylýy tıis oqýshylardyń qabileti men daǵdylarynyń jıyntyǵy.
«Bizdiń bilim júıesi osylardyń 63 qana paıyzyn berip otyr. Bul bilim salasyna qyrýar qarjy bólingenimen, kóptegen bilim alýshylardyń alǵan bilimi biliktilikke aınalmaı jatqanyn kórsetedi. Bizdegi bilim berýdegi teńsizdik pen alshaqtyq qarjylandyrý salasynda da, qala men aýyl mektepteriniń arasynda da aıtarlyqtaı úlken. Mysaly Nazarbaev zııatkerlik mektebi men qarapaıym mektep arasyndaǵy qarjylandyrý aıyrmasy 6 ese bolsa, elimizdegi oqýshylardyń 44 paıyzyn quraıtyn aýyl oqýshylaryna NZM oqýshysynyń bilim deńgeıin qýyp jetýi úshin 6 jyl ýaqyt kerek.
Bilim jáne ǵylym mınıstrligi qazirgi erejege saı 200-den astam qyzmet kórsetedi. Atap aıtqanda, 900 myń búldirshini bar 10 300 balabaqsha, 3,5 mln oqýshy oqıtyn 7 500 orta mektep, 500 myń kontıngenti bar 820 kolledj, 600 myń stýdenti bar 120 JOO jáne jarty mıllıonnan astam muǵalimder men pedagogterdiń jumystaryn úılestirý kerek. Bul bir mınıstrlikke óte úlken salmaq. Sondyqtan da keshe ǵana Prezıdentimiz aıtqandaı, mınıstrliktiń basqarý júıesin ońtaılandyrý joldaryn qarastyrǵan durys dep sanaımyz», - dedi Murat Baqtııaruly.