Nazarbaev jastar tárbıesindegi negizgi ustanymdy atady
«Tabysymyzdy eselep, Táýelsizdigimizdi baıandy ete túsý úshin bizge baltalasa da buzylmaıtyn berik aýyzbirshilik kerek. Bereke-birligimizdi kózdiń qarashyǵyndaı saqtaı alsaq, merekeli tirligimizge tónetin qaýip joq», - dedi Memleket basshysy búgin Parlament palatalarynyń birlesken otyrysynda.
Prezıdenttiń aıtýynsha, qazirgi aýmaly-tókpeli zamanda halyqtyń aýyzbirligi berik bolýy qajet. Osy oraıda N.Nazarbaev ata-babalarymyzdyń eki ımperııanyń ortasynda ómir súrip, neshe túrli qııametti bastan keshirgenin de eske aldy. «Másele halyqtyń kóptiginde, azdyǵynda emes. Másele adamnyń qýattylyǵynda, saýattylyǵynda emes, másele - rýhanı birlikte. Jan aıamaı, «ne Táýelsizdik, ne ómir joq» degen qaǵıdamen ómir súrýimiz kerek. Jastardy solaı tárbıelegen jón. Osy jerde olqylyqtar bar. El men jerdiń ıesi retinde Qazaqstandaǵy jaqsy men jamannyń bárine qazaq jaýapty. Osy uly jaýapkershilikti sezinip, barsha ulystyń uıytqysy bolyp, ózgege ónege kórsete bileıik, aǵaıyn», - dep atap kórsetti Prezıdent.
Aıta keteıik, Parlament palatalarynyń birlesken otyrysynda Memleket basshysy Nursultan Nazarbaev birneshe bastamany jarııalady. Atap aıtqanda, Prezıdent qazaqstandyqtardy baspanamen qamtamasyz etýge baǵyttalǵan jańa baǵdarlamany jarııalady.
Budan bólek, jalaqysy tómen qazaqstandyqtarǵa salyq 1 protsentke deıin tómendeıdi. Shaǵyn nesıelerdiń kólemi de artatyn boldy. Sondaı-aq, Memleket basshysy Astanany gazdandyrý máselesin 1,5 jylda sheshýdi tapsyrdy.