Nazarbaev jáne Qazaq ulttyq ýnıversıtetterinde «Bolashaq» arqyly bilim alatyn jastarǵa til úıretetin kýrs ashylady

ASTANA. QazAqparat - Keler jyly Nazarbaev ýnıversıtetinde jáne Ál-Farabı atyndaǵy Qazaq ulttyq ýnıversıtetinde «Bolashaq» baǵdarlamasy arqyly bilim alatyn jastarǵa aǵylshyn tilin úıretetin kýrstar ashylady. Bul týraly búgin Shetelde kadrlar daıarlaý jónindegi respýblıkalyq komıssııa otyrysy aldynda BAQ ókilderine suhbat bergen Bilim jáne ǵylym mınıstri Aslan Sárinjipov málim etti.

«Komıssııa otyrysy barysynda biz birqatar túlekterge «Bolashaq» stıpendııasyn beretin bolamyz. Búgin osy komıssııa 200-den astam jas mamanǵa stıpendııa taǵaıyndaıdy. Olardyń ishinde 220 magıstrant bar. Sonymen qatar 10-15 adam doktorantýra arqyly shetelde oqıtyn bolady», - dedi ol.

Mınıstrdiń aıtýynsha, qazirgi ýaqytta shetelde 2 myńnan astam jas bilim alýda. Biraq osy 20 jyldyń ishinde «Bolashaq» baǵdarlamasy arqyly 10 myńnan astam jas bilim aldy. Sondaı-aq mınıstr óz sózinde aldaǵy ýaqytta «Bolashaq» baǵdarlamasy arqyly sheteldiń joǵary oqý ornyna túsken jastar elimizde aǵylshyn tilinen kýrstan ótetindigin aıtty.

«Kelesi jyldan bastap Nazarbaev ýnıversıtetinde jáne Almatydaǵy Qazaq ulttyq ýnıversıtetinde aǵylshyn tilin úıretetin kýrstar ashatyn bolamyz. Sonyń nátıjesinde «Bolashaq» baǵdarlamasy arqyly shetelge bilim alýǵa baratyn jastar Qazaqstanda aǵylshynsha úırenedi. Al bul qarjy únemdeýge múmkindik beredi», - dedi A.Sárinjipov.