Nazarbaev ýnıversıtetinde QHR Tóraǵasy Sı Tszınpınge eskertkish taqta ornatyldy
Búgin Nazarbaev ýnıversıtetinde Qytaı Halyq Respýblıkasynyń Tóraǵasy Sı Tszınpın jarııalaǵan «Bir beldeý, bir jol» bastamasynyń 11 jyldyǵyna arnalǵan is-shara ótti.
Aıta keteıik, 2013 jyly dál osy ýnıversıtette Sı Tszınpın «Bir beldeý – bir jol» atty aýqymdy ekonomıkalyq bastamany jarııalaǵan bolatyn. Bul bastama álemdik saýda men yntymaqtastyqtyń damýyna úlken serpin berdi. Arada 11 jyl ótip, osy tarıhı oqıǵanyń qurmetine ýnıversıtet qabyrǵasynda eskertkish taqta ornatyldy.
Іs-sharaǵa Qytaı Halyq Respýblıkasynyń Qazaqstandaǵy Tótenshe jáne ókiletti Elshisi Chjan Sıao, Nazarbaev ýnıversıtetiniń prorektory Ilesanmı Adesıda, sondaı aq QR Syrtqy ister mınıstriniń ókili men basqa da qurmetti qonaqtar qatysty.
Ilesanmı Adesıda óz sózinde Qytaı men Qazaqstan arasyndaǵy berik dostyq pen yntymaqtastyqty atap ótti. Ol Qytaı Tóraǵasy Sı Tszınpınniń 2013 jyly Nazarbaev ýnıversıtetinde ekonomıkalyq jáne dıplomatııalyq yntymaqtastyq bastamasyn jarııalaǵanyn eske saldy.
«Bul bastama tek ekonomıkalyq jáne mádenı baılanystardy nyǵaıtyp qana qoımaı, sondaı-aq halyqaralyq yntymaqtastyqty damytýdaǵy mańyzdy sımvolǵa aınaldy. Búgingi shara eki memleket arasyndaǵy máńgilik dostyqtyń jáne aımaqtyq damý men órkendeýdi birlese ilgeriletýge degen ortaq umtylystyń belgisi bolyp sanalady», - dedi Ilesanmı Adesıda.
Óz kezeginde Qytaı elshisi Chjan Sıao Qazaqstan men Qytaıdyń osy bastama aıasyndaǵy tyǵyz yntymaqtastyǵyn jáne qol jetkizilgen jetistikterin atap ótti. Onyń aıtýynsha, eki el arasyndaǵy saýda-ekonomıkalyq baılanys qarqyndy damyp kele jatyr.
«2023 jyly eki el arasyndaǵy taýar aınalymy 41 mıllıard AQSh dollaryna jetken. Qytaı Qazaqstannyń eń iri saýda seriktesi atandy. Al saýda kólemi bıyl qańtar-shilde aılarynda 70 paıyzǵa ósken», - dep atap ótti Chjan Sıao.
Sonymen qatar elshi eki el arasyndaǵy kólik, energetıka jáne joǵary tehnologııalar salalaryndaǵy yntymaqtastyqty nyǵaıtý mańyzyn atap ótti jáne jastardyń bul protsestegi rólin erekshe atady.
«Jastar – bizdiń bolashaǵymyz. Qazaqstan men Qytaı jastary bizdiń dostyq pen yntymaqtastyǵymyzdy nyǵaıtýda sheshýshi ról atqarady. Men sizderdi osy uly iske belsene atsalysýǵa shaqyramyn», - dedi Chjan Sıao.
Іs-shara sońynda Ilesanmı Adesıda jáne Chjan Sıao birlesip eskertkish taqtany saltanatty túrde ashty.