Nazarbaev Ýnıversıteti «tıimsiz ıgerilgen 73 mlrd teńgege» qatysty túsinikteme berdi

<p>ASTANA. KAZINFORM — 2024 jyldyń ekinshi jartysynda QR Joǵary aýdıtorlyq palatasy «Nazarbaev Ýnıversıteti» derbes bilim berý uıymynyń 2017 jyldan 2023 jylǵa deıingi qyzmetine memlekettik aýdıt júrgizdi, dep habarlaıdy ýnıversıtettiń baspasóz qyzmeti.</p>

Ýnıversıtettiń baspasóz qyzmeti málim etkendeı, jalpy Joǵary aýdıtorlyq palata Ýnıversıtettiń halyqaralyq bilim berý mekemesine aınalyp, aıtarlyqtaı jetistikterge jetkenin atap ótti.

— Ýnıversıtet bilim berý baǵdarlamalaryn halyqaralyq sapa standarttaryna saı etip, bilim berý men ǵylymı zertteýler deńgeıi joǵary ekenin kórsetti. Bul kóptegen akkredıtatsııa jáne álemdegi jetekshi ýnıversıtettermen seriktestiktermen rastalady. Bul rette aýdıt barysynda anyqtalǵan qarjylyq buzýshylyqtar bıýdjettik baǵdarlama sheńberinde stýdentterdiń jol júrýi boıynsha ótemaqyny jáne memlekettik shákirtaqylardy esepteýge baılanysty jáne Ýnıversıtettiń akademııalyq jáne ǵylymı qyzmetine qatysy joq. Aýdıtorlyq esepke sáıkes, Ýnıversıtet jáne onyń uıymdary belgilengen tártippen QR Joǵary aýdıtorlyq palatasynyń usynymdaryn oryndaý jónindegi is-sharalar josparyn ázirledi, ol boıynsha tıisti jumys júrgizilip jatyr. Joǵaryda atalǵan Jospardyń oryndalý barysy týraly aqparatty Ýnıversıtet Joǵary qamqorshylyq keńes pen Qamqorshylyq keńeske turaqty negizde engizip otyratyn bolady, — delingen habarlamada.

Aıta keteıik, 2024 jyly ýnıversıtetti respýblıkalyq bıýdjetten qarjylandyrý kólemi 50%-dy quraıdy, qalǵan soma endaýment-qor jáne demeýshiler, sondaı-aq bilim berý, ǵylymı-zertteý jáne ózge de qyzmetterdi usyný esebinen jınalady.

Konkýrstyq rásimderdi qoldanbaı, satyp alý Nazarbaev ýnıversıtetiniń Qamqorshylyq keńesi bekitken Satyp alý qaǵıdalarynda kózdeletinin habarlaımyz. Olar strategııalyq seriktes ýnıversıtetterge, sondaı-aq akademııalyq jáne ǵylymı qyzmet salasynda qyzmet kórsetetin basqa da kontragentterge qatysty qoldanylady. Óz tarapynan Ýnıversıtet aǵymdaǵy qyzmettegi kórsetilgen kemshilikterdi joıýdan basqa, bolashaqta osyndaı táýekelderge jol bermeý úshin jumys isteıtin bolady. Bul rette Ýnıversıtet jańa bilim berý baǵdarlamalaryn ashýdy, aqyly negizde bilim alýshylar sanyn ulǵaıtýdy, jasandy ıntellekt jónindegi jobany jáne ózge de ǵylymı jobalardy iske asyrýdy josparlap otyr. Sondaı-aq, ǵalymdar men mamandardy daıarlaý jónindegi óziniń strategııalyq mindetterin iske asyrýdy tolyqqandy qamtamasyz etýdi josparlap otyr. Sonymen qatar, kommertsııalandyrýǵa baǵyttalǵan jáne Qazaqstannyń damýy men órkendeýi úshin qajetti ınnovatsııalyq ǵylymı jobalar boıynsha jumys isteýdi jalǵastyrady, — dep túıindedi JOO baspasóz qyzmeti.

Osyǵan deıin Nazarbaev ýnıversıtetinde 73 mlrd teńgeniń tıimsiz ıgerilgeni anyqtalǵanyn habarlaǵan edik.