Nazarbaev Úkimetke turǵyn úı baǵdarlamalaryn qaıta taldaýdy tapsyrdy

ASTANA. QazAqparat - Búgin QR Úkimetiniń keńeıtilgen quramdaǵy otyrysynda Elbasy Nursultan Nazarbaev elimizdiń turǵyn úı baǵdarlamalaryna qaıta taldaý jasaýdy tapsyrdy, dep habarlaıdy QazAqparat tilshisi.

QR Prezıdentiniń dereginshe, «7-20-25» baǵdarlamasy boıynsha 3700 qazaqstandyq baspanaly boldy. Degenmen, halyqtyń barlyq sanatyna birdeı turǵyn úı baǵdarlamalarynyń qyzyǵýyn kórý buıyrmaı otyr. Oǵan jetkilikti tabystyń bolmaýy, salynyp jatqan úılerdiń tapshylyǵy syndy faktorlar áser etýde.

«Men «kimde baspana joq, soǵan ber» desem, ákimder «baspana jaǵdaıyn jaqsartqysy kelgenderge bereıik» deıdi. Árıne olarǵa berýge bolady. Alaıda olardyń sany artyp ketedi. Odan da baspanasy joqtarǵa bereıik. Úıi barlar ony arzan baǵamen alady da jalǵa berip qoıyp aqsha tabady. Al biz búginde baspanasy joqtardy qamtamasyz etýimiz qajet. Al olar eń aldymen jas otbasylar. Sondyqtan halyqaralyq aldyńǵy qatarly tájirıbelerdi eskere otyryp, halyqtyń barynsha mol sanatyna qoljetimdiligin qamtamasyz etý úshin turǵyn úı baǵdarlamalarymyzdy qaıtadan bir taldaýdy tapsyramyn», - dedi Nursultan Nazarbaev.

Sonymen qatar Elbasy Astana, Almaty jáne Shymkent qalalarynda jumysshy jastarǵa arnalǵan 1 myń páter salynatyndyǵyn aıtty.