Nazarbaev: Túrkııanyń saıası turaqtylyǵy men tynyshtyǵy Qazaqstan úshin mańyzdy
«Resmı saparmen Túrik eline shaqyryp, qonaqjaılylyq kórsetkenderińiz úshin barshalaryńyzǵa, eń aldymen Prezıdent myrzaǵa shyn júregimmen alǵysymdy aıtamyn. Baýyrlas Túrkııanyń ishki saıası turaqtylyǵy men tynyshtyǵy Qazaqstan úshin óte mańyzdy. Rejep Taııp Erdoǵandy bıylǵy maýsymda jańa júıe boıynsha ótken prezıdenttik saılaýdaǵy aıqyn jeńisimen taǵy da shyn júrekten quttyqtaımyn», - dep atap ótti Elbasy.
Qazaqstan Prezıdenti saılaý nátıjesi túrki halqy Prezıdent Rejep Erdoǵannyń eren eńbegin joǵary baǵalap, júrgizip otyrǵan saıasaty men strategııalyq baǵyttaryn qoldap otyrǵandyǵyn barlyq dúnıeniń aldynda kórsetkenin basa aıtty.
«Barsha qazaqstandyqtardyń atynan Túrkııa basshylyǵynyń jańa bastamalaryna tabys, baýyrlas túrki halqyna baq-bereke tileımin. Túrkııa Qazaqstannyń eń jaqyn ári senimdi strategııalyq áriptesteriniń biri. Qazir ortaq tarıh pen rýhanı muraǵa negizdelgen qarym-qatynasymyz óristeı túsýde. Baılanysymyz barlyq salada ilgerilep, damyp keledi», - dedi Nursultan Nazarbaev.