Nazarbaev pen Mırzıeev Astananyń kórnekti oryndaryn aralady

ASTANA. QazAqparat -  QR Prezıdenti Nursultan Nazarbaev Ózbekstan Respýblıkasynyń Prezıdenti Shavkat Mırzıeevpen birge Astana qalasynyń kórnekti oryndaryn aralady, dep habarlaıdy Aqordanyń baspasóz qyzmeti.

Qazaqstan Prezıdenti men elimizge memlekettik saparmen kelgen Ózbekstan Prezıdenti «Astana Opera» memlekettik opera jáne balet teatrynda bolyp, «Qyz Jibek» operasynyń daıyndyǵyn kórdi.

Nazarbaev Ýnıversıtetinde bolǵan eki eldiń prezıdentteri bilim ordasynyń damý josparymen, ónerkásipti avtomattandyrý zerthanasymen, oqý ornynyń zertteýshilik jobalarymen jáne fızıka-matematıka zerthanasymen tanysty. Sh.Mırzıeev ýnıversıtettiń qurmetti qonaqtar kitabyna qoltańba qaldyrdy.

Sodan keıin Nursultan Nazarbaev pen Shavkat Mırzıeev resmı ashylǵan «MEGA Silk Way» saýda jáne oıyn-saýyq ortalyǵynyń saýda-kórme pavılondaryn aralap kórdi. Sondaı-aq eki el prezıdentteri «Cirque du Solei» ártisteriniń Monte-Karlodaǵy halyqaralyq festıvaliniń jeńimpazdary qoıǵan shaǵyn teatrlyq kórinis pen akrobatıkalyq shoýdy tamashalady.

Memleketter basshylary qalanyń kórnekti oryndaryn aralap kórgen soń «Astana EKSPO-2017» kórme kesheni qurylysynyń barysymen jáne onyń maketimen tanysty.