Nazarbaev Qazaqstannyń BUU Qaýipsizdik keńesinde atqaratyn jumysynyń 4 baǵytyn atady

ASTANA. QazAqparat - Qazaqstan BUU Qaýipsizdik keńesindegi óz jumysyn 4 baǵytta atqaratyn bolady. Bul týraly búgin Aqordada birqatar shetel elshisinen senim gramotasyn qabyldaǵan Elbasy Nursultan Nazarbaev aıtty, dep habarlaıdy QazAqparat.

«Qurmetti elshi myrzalar! Biz 1-shi qańtardan bastap BUU Qaýipsizdik keńesiniń turaqty emes múshesi retinde óz jumysymyzdy bastadyq. Jahandyq uıymnyń bedeldi organy atynan ókildik etý Qazaqstan úshin óte zor mártebe. Biz Qaýipsizdik keńesinde atqaratyn jumysymyzdyń basymdyǵy 4 baǵytty aıqyndalatyn bolady. Olar: ıadrolyq qaýipsizdik, energetıkalyq qaýipsizdik, sý qaýipsizdigi jáne azyq-túlik qaýipsizdigi. Ózderińizge belgili Qazaqstan óz tarapynan ıadrolyq qarýdan bas tartyp, ıadrolyq polıgondy japqan memleket», - dep atap ótti QR Prezıdenti.

Memleket basshysy sondyqtan da Qazaqstan antııadrolyq qozǵalystyń bastaýshysy ári kóshbasshylarynyń biri bolyp sanalatyndyǵyn basa aıtty.

«Bıyl Astanada halyqaralyq ıadrolyq synaqtarǵa qarsy kúres kúni - 29 tamyzda birqatar halyqaralyq is-sharalar ótkizýdi josparlap otyrmyz. Solardyń qatarynda ǵalymdardyń ıadrolyq qarýsyzdaný jónindegi qozǵalysynyń 60 jyldyq mereıtoılyq sessııasy jáne MAGATE aýmaǵynda tómen baıytylǵan ýran bankin ashýǵa arnalǵan saltanaty bar», - dedi Elbasy.

QR Prezıdenti elimizdiń BUU Turaqty damý maqsattaryn, Parıj kelisimderin iske asyrý, Jasyl ekonomıkany nasıhattaý sharalaryna belsene qatysatyndyǵyn da atap ótti.

«Osy maqsatta Astanada «Bolashaqtyq energııasy» taqyrybymen EKSPO halyqaralyq kórmesi ótedi. Onyń ashylýy 10 maýsymda bolady. Oǵan álemniń 100-den asa eli keledi dep josparlap otyrmyz. Sizderdiń elderińizdiń basshylaryna shaqyrýlar jiberildi. Kórme jumysy aıaqtalǵan soń EKSPO bazasynda «Astana» halyqaralyq qarjy ortalyǵy resmı túrde jumysyn bastaıdy. Onda ІT-startaptardyń halyqaralyq tehnoparkin qurý kózdelgen. Sondaı-aq energetıkaǵa, qorshaǵan ortaǵa mamandanǵan klasterlerdiń ǵylymı-tehnıkalyq parki jumys isteıtin bolady», - dedi Nursultan Nazarbaev.

Aıta keteıik, Qazaqstan Prezıdentine Marokko Koroldiginiń elshisi Abdeljalıl Sobrı, Ońtústik Afrıka Respýblıkasynyń elshisi Kııtýmettsı Sııpelo Tandeka Mettıýs, Birikken Arab Ámirlikteriniń elshisi Mýhammed Ahmed Sýltan Isa al-Djaber, Saýd Arabııasy Koroldiginiń elshisi Zahır ben Mýtısh ál-Anezı, Malaızııa elshisi Dato Saıd Mohamad Bakrı Bın Saıd Abdýl Rahman, Grýzııa elshisi Zýrab Abashıdze, Mońǵolııa elshisi Lývsan Battýlga senim gramotasyn tabys etti.