Nazarbaev Qazaqstan jaıylymdarynda burynǵy qudyqtardy ashýǵa tapsyrdy

ASTANA. QazAqparat - Qazaqstandaǵy jaıylymdarda 3,5 myń qudyq salý josparlanýda. Bul týraly búgin Elbasy Nursultan Nazarbaevtyń tóraǵalyǵymen ótip jatqan Úkimettiń keńeıtilgen májilisinde QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov málim etti, dep habarlaıdy QazAqparat.

«Ótken jyldyń jaıylymdardy sýlandyrý boıynsha jospary oryndaldy, ıaǵnı 600 qudyq salyndy. Aǵymdaǵy jyly taǵy 700 qudyqtyń qurylysy paıdalanýǵa berilmek. Jalpy baǵdarlama aıasynda 3,5 myń qudyqty salý josparlanýda, bul óz kezeginde sýlandyrylǵan jaıylymdardyń kólemin 18 mln gektarǵa jetkizýge múmkindik beredi», - dedi Myrzahmetov baıandamasynda.
Óz kezeginde Memleket basshysy Nursultan Nazarbaev jaıylymdar sýmen qamtamasyz etilse, organıkalyq ónimniń kólemin aıtarlyqtaı arttyrýǵa bolatynyn atap ótti.
«Qazaqstan dalasy mal sharýashylyǵyna beıimdelgen. Kezinde keńestik kezeńde bolǵan myńdaǵan qudyqtar jabylyp qaldy. Bir qudyqtyń tóńireginde 2-3 myń qoı jınaýǵa bolady. Tek osy másele ǵana kedergi bolyp otyrǵan. Barlyq jerdi osy maqsatta paıdalanýǵa bolady. 150 mln gektar jaıylymdyq jerlerimiz bar. Ákimdermen birge árbir qudyqty qarap, sonyń mańaıynda birneshe otar qoı ustasańdar, elimizdi úlken tabys bolady», - dedi Prezıdent mınıstrge qaratyp aıtqan sózinde.