Nazarbaev álemdik máseleniń túp-tórkinin aıqyn bilip otyr - Ravıl Gaınýtdın
Ol óz sózinde osynaý keńestiń ótkizilýine muryndyq bolyp otyrǵan Qazaqstan Respýblıkasynyń Prezıdentine alǵys aıtty.
«Álemdik jáne dástúrli dinder kóshbasshylarynyń ózara oı almasýyna arnaıy alań usynyp otyrǵanyńyz - máselelerdiń túp-tamyryn kórip, beıbitshilik týraly qur sózden naqty iske kóshýge shaqyryp otyrǵanyńyzdy kórsetedi», - dedi Ravıl Gaınýtdın.
Onyń aıtýynsha, májbúrleý men zorlyq-zombylyq senimmen qabyspaıdy.
«Álbette, dinı senimi berik adamdardy zorlyqpen syndyrý múmkin emes. Biraq meniń oıymsha, zorlyq-zombylyqtyń betin senim tájirıbesimen qaıtarýǵa ábden bolady. Ol úshin eń aldymen adamdardyń júregine ıman uıalaýy kerek. Bul týraly on besinshi ǵasyrdyń ózinde krest joryqtaryna qarsy shyqqan kardınal Nıkolaı Kýzanskıı de aıtyp ketken. Onyń senim men beıbitshilik týraly traktaty álemge degen súıispenshilikke toly, ózge dinderdiń ókilderine ashyqtyǵy tamsandyrady», - dedi Reseı múftıler keńesiniń tóraǵasy.
Ravıl Gaınýtdın soǵys mashınasy jetilýiniń basty sebebi - qarýlandyrýdy arttyrý, basqa salalardan góri áskerı-óndiristik keshenge kóbirek qarajat bólý ekenin de atap ótti.
«Osynyń bári de soǵysqa qatysty aıtarlyqtaı úreı týdyrady. Dál osy úreı júıke júıesiniń syr berýine sebepshi bolyp, munyń sońy soǵysqa ulasýy yqtımal. Terrorızm jáne qylmyspen qatar, Islamofobııa tolqyny seziledi. Bul tolqynnyń lebi qazirdiń ózinde kóptegen memleketterde bar, ol jasyryn emes», - dedi Ravıl Gaınýtdın.
Eske sala ketsek, elordada QR Prezıdenti Nursultan Nazarbaevtyń tóraǵalyǵymen Álemdik jáne dástúrli dinder kóshbasshylarynyń VI sezi ótip jatyr. Sez barysynda Qazaqstan Prezıdenti Nursultan Nazarbaev memleketter arasyndaǵy senimdi nyǵaıtyp, qaýipsiz álemdi qalyptastyrý jolynda konfessııaaralyq, órkenıetaralyq dıalog ortalyǵyn bekitýge daıyn ekenin málimdegen bolatyn.
Sondaı-aq Qazaqstan Prezıdenti Vatıkannyń papalyq keńesine «Dinaralyq dıalogqa úles qosqany» úshin syılyǵyn tabys etti. Al orys pravoslavıe shirkeýiniń epıskopy, Volokolam mıtropolıti, Máskeý men búkil Rýs Patrıarhynyń vıkarıi Mıtropolı́t Ilarıón Astanadaǵy dástúrli dánder sezi álemdegi eń iri forýmdardyń birine aınalǵanyn atap ótti.