Nazarbaev «100 oqýlyq» týraly: Jańa múmkindikterge jol ashady
Memleket basshysynyń aıtýynsha, árbir aýdarylǵan kitappen xalyqtyń sanasy túbegeıli ózgeredi. Eń bastysy, sonyń bárin is júzinde kádege jaratýymyz qajet.
«Búgin rýxanı jańǵyrýdyń úlken bir belesi bastaldy. Bul - adamzattyń damý kókjıegin jańa keń entsıklopedııalyq kózqaraspen ashatyn beles. Qazir elimizde ıntellektýaldy damýdyń serpilisi arqyly rýxanı revolıýtsııa bastaldy dep aıtýǵa bolady. Ol nebári birneshe jylda mıllıondaǵan qazaqstandyqtardyń oı-órisin keńeıtip, jańa múmkindikterge jol ashady. Osylaı birtindep búkil xalqymyzdyń sapalyq deńgeıin kóteredi», - dedi N.Nazarbaev «100 jańa oqýlyqtyń» alǵashqy serııasyn tanystyrý kezinde.
Prezıdenttiń sózine qaraǵanda, ata-babanyń murasyn umytpaı, órkenıettiń tórine umtylǵan durys. Biraq jaratylystaný men texnıka ǵylymdaryn ıgerý jetkiliksiz. Qazirgi kezde álemdik damýdyń tizginin ınjenerlik ǵylymdar ustap otyr. Ozyq texnologııalarǵa da qol jetkizgen mańyzdy. Alaıda sol ozyq texnologııalardy qandaı maqsatta jumsaý qajettigin túsiný odan da mańyzdy.
«Jańa oqýlyqtar - naǵyz entsıklopedııa. Qazir bilim berýdiń ádis-tásilderi ǵana emes, mazmuny da asa mańyzdy. Bul rette baǵdarlama jalpyulttyq aǵartýdyń besjyldyǵyn júzege asyrýǵa múmkindik beredi. Osyny oılanaıyq. Negizi, mundaı birtutas baaǵdarlama búkil álemdik tájirıbede sırek kezdesedi. Damýshy elder úshin teńdesi joq mysal dep aıtýymyzǵa bolady», - dep atap kórsetti N.Nazarbaev.
Aıta keteıik, búgin «100 jańa oqýlyq» jobasy aıasynda alǵashqy 18 kitap Prezıdentke tanystyryldy. Sol kezde Memleket basshysy dinı bilimniń mańyzdylyǵyna da erekshe toqtaldy. Sondaı-aq, jemqorlyqtyń qaıdan bastalatynyn da aıtty.