Naýryzdyń saıası ári dinı oqıǵalarǵa eshqandaı qatysy joq - Irannyń qoǵam qaıratkeri

NUR-SULTAN. QazAqparat - Irannyń qoǵam qaıratkeri, Parsy tili men ádebıeti akademııasynyń prezıdenti Ǵolamálı Hoddad Adeldiń Qazaqstan halqyn Naýryz merekesimen quttyqtady, dep habarlaıdy QazAqparat.

«Naýryz – tek Iran jurtyna ǵana tán emes, sondaı-aq óńirimizdiń búkil halyqtaryna tıesili uly meıram. Osy keń baıtaq óńir elderiniń barlyǵy Naýryzdy ulyqtap, qadir tutady. Men Naýryzben Qazaqstan jurtyn quttyqtaımyn. Kelý kezeńin Aı men Kún aıqyndaıtyndyǵy turǵysynan, Naýryz - teńdessiz meıram. Jańa jyldyń bastaýy bolyp keletin Naýryzdyń adamı tulǵalyq, áleýmettik, ulttyq, saıası ári dinı oqıǵalarǵa eshqandaı qatysy joq. Bul - aspan deneleriniń aınalys-qozǵalysyna, kún men túnniń teńelýine, ystyq pen sýyqtyń rettelýine, tabıǵattyń túleýine baılanysty mereke. Sondyqtan, Naýryz – biz ony qolmen rettep, ózgerte almaıtyn tetik-qubylys. Ol - jer betinde Jańa jyl bastaýy bolyp sanalatyn aspanı saǵat», - delingen quttyqtaýda.

Ǵolamálı Hoddad Adeldiń aıtýynsha Naýryz – tirshilik bastaýy, túleýdiń bastaýy, kóktep-ónýdiń bastaýy, teńelýdiń, qalypqa túsýdiń bastaýy, shattyq pen dýmannyń bastaýy. Osy turǵyda, Naýryz barlyq jerde meırammen, shat-dýmanmen, úmitpen qabysqan.

Tabıǵat kóktemniń kelýimen uıqydan oıanyp, boıkúıezdik pen dert-kesalattan arylsa, Naýryz da bizdi, adamzatty, jańa kóktemde tyń kúsh pen jańa dýmanǵa shaqyrady.