Naýryzdyń qaıta toılana bastaǵanyna 30 jyl toldy
Halyqaralyq Túrki akademııasy uıymdastyrǵan Naýryz toıynda memleket jáne qoǵam qaıratkeri, kórnekti ǵalym Myrzataı Joldasbekov otyz jyl burynǵy mańyzdy sheshimdi eske aldy.
«Partııanyń zamanynda Ózbekáli Jánibekov ekeýmiz aqyldasyp, zamany keldi ǵoı, halyqtyń dástúrlerin jańǵyrtaıyq, Naýryzdy qaıtadan toılap, ádet-ǵuryp, salt-dástúrdi qalyptastyraıyq degen pátýaǵa keldik. Sóıtip, seń qozǵala bastaǵan zamandy paıdalanyp, Naýryzdy meıram retinde qaıta belgiledik. Sonda ózge baýyrlas elderdiń barlyǵy Naýryzdy 21-i kúni toılaıdy ǵoı. Ózbekáli aǵamyz ony quptamady. Aıdyń 21-inen 22-sine qaraǵan túni Naýryz keletinin aıtty. Mine, sodan beri otyz jyl ótipti, Naýryz halqymyzdyń eń qasterli merekesine aınaldy», - dedi Myrzataı Joldasbekov.
Aıta keteıik, Myrzataı Joldasbekov 1988-1990 jyldary Qazaqstan kompartııasy Ortalyq komıtetiniń Ideologııalyq bólimin basqarǵan. Al Ózbekáli Jánibekov - 1988-1991 jyldary Qazaqstan kompartııasy Ortalyq Komıtetiniń hatshysy bolǵan.
1926 jyly Qazaqstanda Naýryzǵa musylmannyń dinı meıramy retinde tyıym salyndy. 62 jyldan keıin ǵana - 1988 jyly Naýryz merekesi qaıta toılana bastady. Onyń jańǵyrýyna kórnekti memleket qaıratkeri, etnograf-ǵalym Ózbekáli Jánibekov kóp eńbek sińirdi.
2010 jyly 23 aqpanda BUU Bas assambleıasy Albanııa, Aýǵanstan, Ázerbaıjan Iran, Qazaqstan, Qyrǵyzstan, Makedonııa, Tájikstan, Túrkimenstan, Túrkııa jáne Úndistannyń usynysymen 21 naýryzdy «Halyqaralyq naýryz kúni» dep bekitti.