Naýryzdy jaqsylyq pen jasampazdyqqa umtylýdyń nyshany dep qabyldaımyz – Senat tóraǵasy

ASTANA. QazAqparat – Parlament Senatynyń tóraǵasy Máýlen Áshimbaev Qazaqstan halqyn áz-Naýryz meıramymen quttyqtady, dep habarlaıdy QazAqparat.

«Qurmetti dostar! Barshańyzdy Naýryz meıramymen shyn júrekten quttyqtaımyn!

Áz-Naýryz – qýanysh pen shattyqtyń, jańarý men jańǵyrýdyń merekesi. Tereńnen tamyr tartatyn bul meıramdy jaqsylyq pen jasampazdyqqa umtylýdyń nyshany dep qabyldaımyz. Ulystyń uly kúninde ulttyq qundylyqtarymyz tórge shyǵyp, saltymyz ben dástúrimiz dáripteledi.

Shyn máninde, halqymyz Naýryz aıyn jyldyń basy dep qashanda erekshe kóńil-kúımen qarsy alǵan. Osy kúnderi aǵaıyn-týystyń basy qosylyp, bulaqtyń kózin ashý, aǵash otyrǵyzý sııaqty izgi amaldar jasalǵan. Munyń bári – eldiń yrysyn arttyryp, yntymaǵyn nyǵaıtatyn, urpaqty tatýlyq pen tazalyqqa úndeıtin ıgi ister», - dep jazdy M.Áshimbaev Facebook-tegi jeke paraqshasynda.

Senat spıkeri taǵylymy zor, ónegesi mol osyndaı merekede ár shańyraqqa amandyq pen baq-bereke tiledi.

Aıta keteıik, Ulystyń uly kúni – Naýryz meıramy Qazaqstanda 21-23 naýryz kúnderi aralyǵynda atap ótiledi. Bul kúnder merekelik demalys sanalady.