Naýryzda kúrish, un men et óndirýshiler baǵany qymbattatqan

NUR-SULTAN. QazAqparat – Naýryz aıynda Qazaqstanda kúrishtiń baǵasy - 2%, qara bıdaı unyna - 3,4%, mal eti 2% qymbattady, dep habarlaıdy QazAqparat QR Ulttyq ekonomıka mınıstrligi Statıstıka komıtetine silteme jasap.

«Ónerkásip ónimderin óndiretin kásiporyndardyń baǵasy aǵymdaǵy jylǵy úsh aıda (2020 jylǵy naýryz aıyn 2019 jylǵy jeltoqsanmen salystyrǵanda) 1,7% tómendedi. Baǵanyń ken óndirý ónerkásibinde - 3,2%, óńdeý ónerkásibinde 0,5% tómendeýi baıqaldy. Ónerkásiptik ónimder 2,1% arzandady, ónerkásiptik sıpattaǵy kórsetiletin qyzmetter 2,1% qymbattady», - delingen aqparatta.

Statıstıka komıteti sondaı-aq ótken aıda bolǵan baǵa ózgerisin málim etti. Atap aıtqanda, naýryzda óndirýshi kásiporyndar baǵasy munaıǵa - 5%, mazýtqa - 2,8%, benzınge - 0,7%, dızel otynyna 0,3% tómendedi. Al metall kenderine - 9,3%, tabıǵı gazǵa - 1,5%, kómirge 0,3% joǵarylady.

Baǵa sondaı-aq myryshqa - 7,5%, qara metaldar ılegine - 6,4%, mysqa - 3,3%, qorǵasynǵa 2,7% tómendegen. Asyl metaldar quny - 2,4%, alıýmınıı 1,4% qymbattady.

«Óndirýshiler baǵasynyń kúrishke - 2%, qus etine - 1%, balyqqa 0,6% tómendegeni, jarmalarǵa jáne qara bıdaı unyna - 3,4%, mal etine - 2%, sút ónimderine - 1,9%, ósimdik maıyna - 1,8%, bıdaı unyna - 1,3%, makaron ónimderine - 0,9%, shaıǵa - 0,7%, nanǵa jáne qantqa 0,5% joǵarylaǵany tirkeldi», - delingen aqparatta.