Naýryzda adamdar bir-birine jaqsylyq, birlik, yntymaq, dostyq tileıdi - Saparbaev

AQTÓBE. QazAqparat  - Aqtóbe oblysynyń ákimi Berdibek Saparbaev búgin ortalyq alańǵa jınalǵan halyqty Naýryz merekesimen quttyqtady. Óńir basshysy óz sózinde Naýryz meıramy otyzynshy ret ótip jatqanyn aıtyp berdi, dep habarlaıdy QazAqparat tilshisi.

 Aqtóbegi Óner ortalyǵynyń aldynda «Naýryzym -qut bereke!» atty teatrlandyrylǵan qoıylym kórsetildi. Ortalyq alańǵa shyqqan aqtóbelikterge Naýryz kóje, baýyrsaq, palaý tegin taratylyp, kóshege shyqqan adamdardyń bárine taǵam usynyldy. Al aǵash úılerde kórme uıymdastyryldy. Alańǵa shyqqan aqtóbelikterdiń oblys ákimi Berdibek Saparbaev quttyqtady.

«Joǵalǵanymyz tabylyp, óshkenimiz janyp jatqanynyń bári táýelsizdiktiń arqasy dep bilemiz. Búgin Naýryz merekesin otyzynshy ret toılap otyrmyz. Egemendigimizdiń arqasynda, Memleket basshysy Nursultan Nazarbaevtyń jarlyǵymen Naýryz merekesi memlekettik merekemiz bolyp esepteledi. Naýryz merekesin dúnıejúzinde kóptegen halyq toılaıdy. Bul merekede bir-birine jaqsylyq, birlik, yntymaq, dostyq tileıdi. Arada bolǵan arazdyq joıylyp, tatýlasady, keshiredi. Jaqsylyǵymyz, ósip-ónýimiz Qazaqstan halqy arasyndaǵy birlikke, yntymaqqa baılanysty. Qystan aman-esen shyǵyp, jańa jyldy bastap otyrmyz. Ótken jyl aqtóbelikter úshin tabysty boldy. Elimizde saıası-qoǵamdyq turaqtylyq bar. Halqymyz bir-birin qoldaıdy. Halyq pen bılik birigip, jumys istep, óńir ekonomıkasy ósip, turmysy, jaǵdaıy, ál-ahýaly jaqsaryp keledi. Osynyń bári Memleket basshysy Nursultan Nazarbaevtyń júrgizip otyrǵan syrtqy jáne ishki saıasatynyń arqasy dep bilemiz»,- dedi óńir basshysy Berdibek Saparbaev.
 

Budan soń óńir basshysy «Baqytty bala» jyly men Analarǵa taǵzym jobasynyń mańyzdyǵyn atap ótti. Balalar jylyna oraı bıyl alańdar salynyp, sport keshenderi paıdalanýǵa beriledi.

«Bıylǵy jyldy «Baqytty bala» jyly dep atap otyrmyz. Árbir memlekettiń bolashaǵy, damýy, gúldenýi, ósýi, urpaqtaryna baılanysty. Balalarǵa barlyq jaǵdaıdy jasaıtyn múmkindigimiz bar. Ata-analardyń, úlkenderdiń mindeti - balalardy zaman talabyna saı, óz zamandastarynan kende qalmaıtyn etip tárbıeleý. Al «Analarǵa taǵzym» úıi bala boryshynyń oryndalýy dep túsinemiz. Bárimiz anadan jaralǵanbyz. Analardyń aldynda basymyzdy ıemiz», - dedi Berdibek Saparbaev.
 

Aıta keteıik, oblys ákimi búgin «Men aqtóbelikpin», «Baqytty bala -Máńgilik el kepili», «Týǵan jerge taǵzym», «Rahanı jańǵyrý», «Naýryz -jyl basy», «Analarǵa taǵzym», «Astananyń 20 jyldyǵy» atty jeti aǵash úıge kirip shyqty.