NaýryzChallenge: Qostanaıda kópbalaly otbasy baspanaly boldy

ASTANA. QazAqparat - Respýblıka kóleminde jarııalanǵan NaýryzChallenge meıirimdilik aktsııasy bastaldy. Bastamaǵa «Nur Otan» partııasynyń Qostanaı oblystyq fılıaly alǵashqylardyń biri bolyp ún qosty, dep habarlaıdy QazAqparat.

Partııa baspasóz qyzmetiniń málimetinshe, «nurotandyqtar» jyldyń jańa maýsymyn jaqsy ispen bastap, ózgelerge jaqsylyq jasaýǵa úndeıdi. Mańyzy mol, qaıyrymdy is jasaý naýqany aldymen Qostanaıdyń Taran aýdanynda kórinis tapty.

Eldi mekenge qarasty Tobyl aýylynda kópbalaly Smırnovtar januıasy talaı ýaqyttan beri baspanaǵa muqtaj bolatyn. «Nur Otan» partııasy olardyń bul armandaryn júzege asyrdy. «Pervomaıskıı şebenochnyı zavod» seriktestiginiń basshysy Sergeı Kım men «Nur Otan» partııasy tóraǵasynyń birinshi orynbasary Jańabaı Bısımbaev olarǵa saltanatty túrde úıdiń kiltin tabystady. Kópbalaly otbasynyń qýanyshy qoınyna syımaı, sheksiz rıza boldy.

«Bul men úshin úlken baqyt. Eski úıdegi jaǵdaıymyz onsha bolmaıtyn. Balalar bolsa ósip jatyr. Partııaǵa jáne kásipkerlerge kórsetken kómekteri úshin aıtar alǵysym sheksiz», - deıdi Elena Smırnova.

Aıta ketý kerek, #NaýryzChallenge meıirimdilik aktsııasyna kez kelgen azamat qatysa alady.

«Osy rette kishi jáne orta bıznes ókilderi men bul máselege beı-jaı qaramaıtyn azamattardy kóp balaly otbasylar, kómekke muqtaj jandarǵa járdem jasaýǵa belsendilik tanytýǵa shaqyramyn. Ómirdiń qıynshylyǵyn kórip otyrǵan jandarǵa kómektesý- bizdiń ortaq mindetimiz», - deıdi «Nur Otan» partııasy QOF tóraǵasynyń birinshi orynbasary Jańabaı Bısımbaev.

Osylaısha partııalyqtar jaqsylyq jasaý aktsııasyn bastady. Meırimdilik bastamasynyń qatysýyshysy atanǵyńyz kelse onda: #NaýryzChallenge #DelaıDobro #JaqsylyqJasa heshtegimen áleýmettik jelilerde #NaýryzChallenge #DelaıDobro #JaqsylyqJasa dep foto-beıne qaldyrýyńyz kerek.

«Bir-birimizge mańyzdy ári paıdaly jaqsylyqtardy meıirimmen jasaımyz. Jaqyndarymyzǵa, ásirese kómek pen jylýǵa zárý jandarǵa qýanysh syılaımyz», - deıdi partııalyqtar.