Naýryz Tahi kókshetaýlyqtarǵa merekelik kóńil kúı syılady

KÓKShETAÝ. QazAqparat - Ulystyń uly kúni – Naýryz merekeleý aıasynda Kókshetaýda qala turǵyndary men qonaqtaryna «Naýryz Tahi» qyzmet kórsetti, dep habarlaıdy QazAqparat tilshisi.

Aqmola oblysy ishki saıasat basqarmasynyń Jastar resýrstyq ortalyǵy uıymdastyrǵan «Naýryz Tahi» jobasynyń maqsaty, Ulystyń uly kúni qala turǵyndaryna tegin qyzmet kórsetý arqyly merekelik kóńil kúı syılaý boldy.

«Qala turǵyndaryn arnaıy bezendirilgen taksı kóligine otyrǵyzyp, jol boıy vıktorınalyq suraq-jaýap oıyny oınatyldy. Suraqtarǵa durys jaýap bergen jolaýshyǵa túrli syılyqtar berilip, baýyrsaqtar men táttiler úlestirildi. Birer saǵattyń ishinde birneshe turǵynǵa qyzmet kórsetildi» - dedi Jastar resýrstyq ortalyǵy basshysynyń mindetin atqarýshy Dastan Ermekov.

Ózge kezeginde taksı jolaýshylary baratyn jerine tegin jetip qana qoımaı, merekelik quttyqtaýlary men izgi tilekterin aıtty.

«Avtobýsqa otyrý úshin aıaldamǵa shyqqan edim. Taksı toqtatý múldem oıymda bolmady. Tamasha merekelik kóńil-kúı syılap, ıgi isti qolǵa alyp otyrǵan óńir jastaryna alǵysym sheksiz. Osyndaı ıgi ister merekelerde ǵana emes, jaı kúnderi de jıi uıymdastyrylyp tursa nur ústine nur bolar edi», - dep aqjarma tilegin bildirdi qala turǵyny Táttigúl Ybyraeva.

Aıta ketsek, Aqmolalyqtar Naýryz meıramyn erekshe toılap jatyr.