Naýryz meıramynda shańyraq kótergen jastarǵa Nursultan Nazarbaev aq batasyn berdi

ASTANA. QazAqparat - Búgin Astanada Naýryz merekesi kúni shaǵyraq kótergen elordalyq jastarǵa Tuńǵysh Prezıdent-Elbasy Nursultan Nazarbaev aq batasyn berdi, dep habarlaıdy QazAqparat tilshisi.

Belgili bolǵandaı, búgingi merekelik shara barysynda 9 jup úılený toıyn atap ótip jatyr.

Elbasy nekelerin qıǵan jas otbasylardy este qalarlyq osy mańyzdy kúnderimen quttyqtap, jastarǵa baqytty uzaq ómir tiledi. Nursultan Nazarbaev eldegi tynyshtyqtyń saqtalýyn, árbir otbasynyń ósip, órkendeýin, sondaı-aq jastardyń patrıottyq rýhta tarbıelenýin tilek etti.

Aıta keteıik, búgin EKSPO-qalashyq aýmaǵyndaǵy Naýryz meıramymen halyqty quttyqtaýǵa Elbasy men QR Prezıdenti Qasym-Jomart Toqaev keldi.

Elordada alty alańda kıiz úıler tigilip, etnoaýyldar ashyldy. Kelýshiler merekelik kontserttik baǵdarlamalar tamashalap, qazaq kúresi, arqan tartys, gir kóterý, asyq atý jáne armrestlıng sııaqty ulttyq sport túrlerinen kúsh synasyp jatyr. Astana turǵyndary men qonaqtary baýyrsaq, palaý, naýryz kóje, irimshik taǵamdarynan dám tatyp, altybaqan mańyna jınaldy.



Jalpy Naýryz meıramynyń qurmetine Astanada 50-ge jýyq kıiz úı men 10-nan artyq altybaqan ornatylady.