Naýryz meıramyna oraı áskerı qyzmetshiler kók aspanda shańyraqtyń keskinin beıneledi (FOTO, VIDEO)

ASTANA. QazAqparat - Barsha qazaqstandyqtar jýannyń jińishkerip, jińishkeniń úziletin, jańarý, kún men túnniń teńeletin shaǵy, asyǵa kútken áz-Naýryz meıramyna qyzý daıyndalýda. Qazaqstan Respýblıkasy Qarýly Kúshteriniń áskerı qyzmetshileri bul meıramdy barlyq elde keńinen atap ótedi. Osy kóktemgi merekege oraı Áýe qorǵanysy kúshteriniń áskerı qyzmetshileri qazaqstandyqtarǵa syılyq tartý etti, dep habarlaıdy QR Qorǵanys mınıstrliginiń baspasóz qyzmetinen.

Sý-27 joıǵysh ushaqtarynda avıabazadan ushyp shyǵyp, kók aspanda otbasy - oshaq qasynyń, urpaq jalǵastyǵynyń, januıalyq jylýlyq pen yrys-berekeniń sımvolyna aınalǵan shańyraqtyń naqyshyn beıneledi. Qazaq halqynda osy elementpen kóptegen izgi tilekter baılanysty. Máselen, «Shańyraǵyń bıik bolsyn», «Shańyraǵyń shaıqalmasyn» degen syndy aq tilekke toly bataly sózder jıi kezdesedi. QR Qarýly Kúshterinde shýaqqa toly kóktemgi meıram qarsańynda saltanatty is-sharalar, merekelik kontsertter jáne kórmeler ótýde.