Naýryz merekesinde Túrkistanǵa 35 myńnan astam týrıst keldi

TÚRKІSTAN. QazAqparat - Naýryz merekesinde Túrkistanǵa 35 myńnan astam saıahatshy men qonaq keldi, dep habarlaıdy QazAqparat tilshisi.

Naýryz merekesine arnalǵan demalys kúnderi Túrkistan qalasyna elimizdiń túkpir-túkpirinen 9 myńǵa jýyq saıahatshy men 26 myńnan astam qonaq keldi. Saıahatshylar men jalpy kelýshilerge arnalyp merekelik is-sharalar uıymdastyryldy.

Túrkistan oblysynyń týrızm basqarmasy arnaıy keste túzip, «Kerýen saraı» demalys ornynyń sýburqaǵy alańynda kontserttik baǵdarlamalar usynyldy. Túrkistan qalasy ákimdigi tarapynan da saıabaqtarda jalpyhalyqtyq serýender, merekelik is-sharalar qolǵa alyndy.
«Kerýen saraıdaǵy» sý aıdynynda Qazaqstannyń tanymal juldyzdarymen birge Ázirbaıjan eliniń de ánshisi án shyrqady. 19-naýryzda Aıqyn Tólepbergen kontserttik baǵdarlamasyn usynsa, 20-naýryzda Dastan Orazbekov án shyrqady. Sondaı-aq Rise & Abudi, Qali, «FM» toby, Amıl Gasanoglý (Ázerbaıjan), Janbolat pen Jazıra, Kenjebek Janábilov jáne ózge de ánshiler ashyq aspan astynda án salyp, jurtshylyqqa kóterińki kóńil-kúı syılady. Túrkistan oblysynyń ónerpazdary da merekege óz úlesterin qosty.
Mereke kúnderi Ekobazar ashylyp, «Jibek jolyn» saıabaǵynda, «Jeńis» saıabaǵynda Naýryzǵa arnalǵan is-sharalar ótti. Sýretshilerdiń halyqaralyq forýmy, «Bórte» qoıylymy, «Nauryz Open Air» festıvali jáne ózge de mádenı jıyndar kópshilikti serpiltti. Aýa raıy jylynatyn sátten bastap Túrkistanǵa kelýshi saıahatshylar sany eselep artady degen boljam bar. Búginde oblys ortalyǵynda halyqaralyq talapqa saı mádenı-rýhanı keshender, demalys oryndary, saıabaqtar elge qyzmet kórsetip jatyr.