Naýryz merekesi: QazAqparatqa quttyqtaýlar legi aǵyldy

NUR-SULTAN. QazAqparat – Ulystyń uly kúni – Naýryz merekesine oraı «QazAqparat» HAA atyna quttyqtaýlar legi aǵylýda. Quttyqtaý joldaýshylar arasynda agentiktiń sheteldik áriptesteri, shet el elshileri, sondaı-aq Qazaqstannyń shet elderdegi dıplomatııalyq mıssııalar ókilderiniń lebizderi berilgen.

Atap aıtqanda, Islam yntymaqtastyǵy uıymynyń Aqparat agenttikteri Odaǵy (UNA) tarapynan Halyqaralyq baılanystar bóliminiń basshysy Hazem Abdo aıtýly kúnimen quttyqtady.

«Osynaý úmit pen bereke syılaıtyn kóktemniń shýaqty meıramy qutty bolsyn! Múmkindikti paıdalana otyryp, Jaratqannan sizderdiń elińizge bereke tilep, progresti qadamdaryńyz úshin turaqtylyqty máńgilik etýin tilep, álemdi shektegen koronavırýs pandemııasynyń sońyn bıyl kórýge jazsyn deımin», - delingen quttyqtaý hatta.

Al IRNA Iran Islam Respýblıkasy aqparat agenttiginiń basqarýshy dırektory Mohammad Reza Norýzpýr joldaǵan hatynda Naýryzdyń uly mádenı mura ekenin atap ótilgen.

«Naýryz – bizdiń óńirimizde jyldar boıy saqtalyp ári bizdiń halyqtarymyz ózara toılap kele jatqan uly mádenı mura. Bul bir jaǵynan eki el dostyǵynyń sımvoly», - delingen quttyqtaý hatta.

Budan bólek, «QazAqparat» HAA atyna Qyrǵyz Respýblıkasynyń Qazaqstan Respýblıkasyndaǵy Elshisi Jeenbek Moldokanuly Kýlýbaevtan, Qazaqstan Respýblıkasynyń Túrikmenstandaǵy, Japonııadaǵy, Qatar Memleketindegi Mońǵolııadaǵy Estonııa Respýblıkasyndaǵy, Belarýs Respýblıkasyndaǵy Elshileri atynan quttyqtaýlar kelip tústi.