Naýryz merekesi: áskerı qyzmetkerler toǵyzqumalaq chempıonatynda baq synady
Sport komıteti – Ortalyq sport klýby jarysty eki topta uıymdastyrdy. Alǵashqy topta Qorǵanys mınıstrligi men Bas shtab departamentteriniń, basqarmalarynyń, ortalyqtarynyń, ekinshi topta Qarýly kúshter bas basqarmalarynyń (basqarmalarynyń), áskerı bólimderi men mekemeleriniń ókilderi saıysqa tústi.
Chempıonatqa barlyǵy 70-ke jýyq áskerı qyzmetshi men qyzmetker qatysty. Aıta keterligi, tórt myń jyl buryn paıda bolǵan ejelgi ústel oıyny ónerinde Úndistannan kelgen Ulttyq qorǵanys ýnıversıtetiniń oqytýshysy podpolkovnık Shına Goel men qyrǵyzstandyq magıstrant polkovnık Rınat Muqambetov te óz kúshterin synap kórdi.
«Toǵyzqumalaqtan jarys ótkizý bizdi tapqyrlyqpen, kóregendikpen jáne tózimdilikpen erekshelenetin ata-baba dástúrine daǵdylandyrady. Bul qasıetter kúndelikti ómirde de, qyzmette de kúsh beredi», - dep atap ótti Qorǵanys mınıstrligi apparatynyń basshysy, polkovnık Erbol Qumarbekuly.
Komandalyq esepte birinshi toptaǵy «altyndy» Jaýyngerlik daıarlyq departamentiniń sportshylary jeńip alsa, ekinshi topta 14776 áskerı bóliminiń quramasy úzdik atandy.
Ortalyq apparat tobyndaǵy jeke birinshilikte erler arasynda Geoaqparattyq qamtamasyz etý departamentiniń ókili, 3-synypty serjant Shalqar Іlııasov, áıelder arasynda Jaýyngerlik daıarlyq departamentiniń ókili, kishi serjant Dáýrengúl Nurlanqyzy joǵary óner kórsetti.
Basqarmalar men áskerı bólimder tobynda erler arasynda áskerı polıtsııa bas basqarmasynyń ókili, qatardaǵy jaýynger Aıtym Erasyl, áıelderde arasynda 14776 áskerı bóliminiń ókili, maıor Zamıra Bekmuratova úzdik nátıje kórsetti.
Elordalyq desanttyq-shabýyldaý brıgadasynyń sportshysy, 3-synyp serjanty Gúljan Bolysbaeva «Jeńiske degen jigeri úshin» nomınatsııasynda marapattaldy.
Jarysqa belsendi qatysqany úshin Ulttyq qorǵanys ýnıversıteti men Qarýly kúshter Memlekettik áskerı-tarıhı murajaıynyń komandalaryna, sondaı-aq oqytýshy Shına Goel men magıstrant Rınat Muqambetovke gramotalar tabystaldy.