Naýryz kóje jasaýǵa almatylyqtar qansha qarajat jumsaıdy
Naýryz kóje - Ulystyń uly kúni jasalatyn qasıetti as. Oǵan tary, arpa, bıdaı, burshaq, kúrish sııaqty jeti túrli dán men aq qosylady. Túrki halyqtarynyń uǵymynda jeti sany qasıetti sanalǵandyqtan, naýryz kójege jeti túrli dám qosylady. Oǵan qosa, ol - toqshylyq pen yrys quttyń joralǵysy.
Naýryz kóje keler jylǵy molshylyqtyń jarshysy retinde naýryz toıynda árbir shańyraqta mindetti túrde ázirlengen. Soǵymnan arnaıy saqtalǵan músheler (qazy, qarta, shujyq, taǵy basqalary) de qosylady.
Qazaqstannyń ár óńirinde Naýryz kóje ártúrli ádispen daıyndalady. Árbir áıeldiń óziniń dástúrli retsepti bar, ol urpaqtan urpaqqa berilip, jalǵasyn taýyp keledi.
Bıyl meıram qarsańynda almatylyqtar atalǵan ulttyq taǵamdy daıyndaýǵa ortasha eseppen qansha aqsha jumsaıtynyn, sondaı-aq kójege qosylatyn dámderdiń baǵasyna sholý jasap kórdik.
Almatylyq Uldana Baıbatyrovanyń «Kók bazarda» jeke sóresi bar. Ol Naýryz kójege qosylatyn dándi- daqyl satady.
Onyń aıtýynsha, tutynýshylardyń sany naýryz aıynyń basynan bastap artady. Almatylyqtar Naýryz meıramyna erterek qamdanady.
«Jyl saıyn naýryzdyń 10-20 aralyǵynda bizde satyp alýshylar aǵyny kóp bolady. Baǵalarǵa keletin bolsaq, ıá, olar bir orynda turmaıdy. Máselen, bıylǵy kóktemde keıbir jarmalardyń qymbattap ketkenin baıqap otyrmyz. Azamattar áli de qarapaıym dúkenderden emes, bazardan satyp alýǵa tyrysady, óıtkeni ıngredıentterdiń tańdaýy kóp, baǵasy da tıimdi», - deıdi satýshy.
Almatylyq bir otbasy Naýryz kójege shamamen 15 myń teńge jumsaıdy. Qalada súrlengen et, qazy baǵasy 4000 teńgeden joǵary. Tarynyń kelisi 1300-1500 teńge; bıdaı men arpa kelisi - 1000 teńge; qatyq - 1000-1500 teńge; qurt-3500 teńge.
Sondaı-aq, almatylyqtardyń kóbi Naýryz kójege burshaq (fasol ) qosady. Onyń baǵasy 1000-den joǵary. Aıran men súttiń lıtri 500 teńgeden joǵary.