Naýryz aıynda eń joǵary ınflıatsııa tirkelgen

NUR-SULTAN. QazAqparat – Naýryz aıyndaǵy ınflıatsııalyq úrdisterge sholý jasaǵan QR Ulttyq banki jyl basynan beri naýryz aıynda elimizde eń joǵary ınflıatsııa tirkelgenin jazdy, - dep habarlaıdy QazAqparat tilshisi.

Ulttyqbank deregi boıynsha, naýryzda aılyq ınflıatsııa 3,7% deńgeıinde, jyldyq ınflıatsııa 12% deńgeıinde qalyptasty. Baǵanyń ósýi ınflıatsııa komponentteriniń búkil ólshemderi boıynsha baıqalǵan.

«2022 jylǵy naýryzda tutyný baǵalary 3,7%-ǵa ósip, 1996 jyldan bastap osy aı úshin eń joǵary mándi kórsetti. Jyldyq mánde baǵanyń 12%-ǵa deıin ósýiniń jedeldeýi baıqaldy (2022 jylǵy aqpanda – 8,7%). 2022 jylǵy naýryzda azyq-túlik taýarlary baǵasynyń ósýi jyldyq mánde 15,4%-ǵa deıin jedeldedi (2022 jylǵy aqpanda – 10%)», -dep jazady Ulttyq bank mamandary.

Al azyq-túlik emes taýarlardyń jyldyq ınflıatsııasy 10,9%-ǵa deıin jedeldegen.

«Teńge baǵamynyń álsireýi taýarlardyń barlyq toptary boıynsha baǵanyń ósýine áser etti. Mıkrochıpterdiń jetispeýshiligi aıasynda avtomobılderdiń quny ósti. Importtyq baǵanyń ósýine baılanysty kıim men aıaq kıim men dári-dármek baǵasynyń ósýi jedeldedi», - dep jazylǵan Ulttyq bank málimetinde.

Al aqyly qyzmetter baǵasynyń jyldyq ósý qarqyny 2022 jylǵy naýryzda 8,3%-ǵa deıin jyldamdaǵan.

Ulttyq ekonomıka mınıstri Álibek Qýantyrov qazaqstandyqtarǵa qolda bar aqshasyn teńge depozıtterinde saqtaýǵa keńes berdi.