Naýryz-2019: Qostanaıdyń úzdik kelinderi men palaýshylary anyqtaldy
Búgin Qostanaıdyń basty alańynda dástúr boıynsha kıiz úı qalashyǵy quryldy.Áýeli oblys ákimi Arhımed Muhambetov qostanaılyqtardy ulyq merekemen quttyqtady.
«Naýryz - jalpyhalyqtyq kóktem merekesi. Birlik pen tatýlyqqa shaqyrady. Kóptegen jyldar boıy biz elimizdiń bereke-birliginiń sımvolyna aınalǵan Naýryz merekesin toılaımyz. Ata-babalarymyzdyń dástúrlerin jalǵastyryp, sol arqyly olardyń tarıhı qundylyǵyn saqtaımyz. Osy jyly biz Naýryzdy erekshe sezimmen qarsy alamyz. Sebebi, mereke qarsańynda elimizdiń Tuńǵysh Prezıdenti Nursultan Nazarbaev óz ókilettigin doǵarý týraly jaýapty sheshim qabyldady. Nursultan Ábishulynyń tabysty Qazaqstandy qurýdaǵy tarıhı róli men orasan zor eńbegin baǵalaý qajet. Elbasy bastamalarynyń arqasynda osy jyldar boıy elimiz beıbitshilik pen turaqtylyq ıdeıasyn júzege asyryp keledi», - dedi óńir basshysy.
Munan soń úzdik bezendirý baıqaýyna kásiporyndar, kásipkerler men oqý oryndary qatysty. Olar kıiz úı ishinde merekelik dastarhan jaıdy. Sálden soń «Palaý - dastarhan qazynasy» kórmesi bastaldy. Oblystyń ár aýdanyna kelgen palaý jasaýshylar synǵa tústi. Solardyń biri - Saıd Sýltonhodjaev Ózbekstannan kóship kelgen. Palaýdy 13 jasynan daıyndaıdy.
«Búgin qostanaılyqtarǵa Namanǵan palaýynyń dámin tattyrdyq. Byltyr da palaý jasaý saıysyna qatysyp, jeńimpaz atanǵanmyn. Bıyl da úmit kóp. Óıtkeni, basqasha retsept usynyp otyrmyz», - deıdi saıys qatysýshysy.
Osy ýaqytta «Ájemniń tátti baýyrsaqtary» atty kelinder baıqaýy qatar ótti. Sondaı-aq, qala ortalyǵynda teatrlandyrylǵan qoıylymdar, horlar sherýi jáne merekelik kontsert Naýryzdyń kórigin qyzdyrdy. Tús áletinde qalanyń jas ártisteriniń qatysýymen «Naýryzbek-Naýryzgúl!» atty kóktemgi esimder merekesi uıymdastyryldy.
Merekelik sharalar legi «Armandastar» vokaldyq stýdııasy jáne «Aq darıǵa» qazaq ánderi horynyń kontsertimen aıaqtaldy.