Naýryzdy dáripteýge yqpal etetin jalpyulttyq tujyrymdama qabyldaý kerek – senator
«Jańa jyldy qarsy alý jyldan-jylǵa kúrdelenip, jaı otbasylyq merekeden aýqymdy materıaldyq sharaǵa aınalyp bara jatqany jasyryn emes. Úlken qalalarda, oblys, aýdan, ortalyqtarynda ornatylǵan alyp shyrshalar, muz qalashyqtary, atylǵan otshashýlar memleket qazynasyna salmaq túsirip, turǵyn úı keshenderinde atylyp jatqan pırotehnıkalar qýattylyǵy jaǵynan adamǵa úreı týdyryp, materıaldyq zaqym keltirip jatyr. Jańajyldyq syılyq izdep sabylyp júrgen adamdardan saýda ortalyqtarynda aıaq alyp júre almaısyń. Al baǵasy sharyqtaǵan balalar oıynshyqtarynyń basym kópshiligi shetelden keletindigin, sheteldiń dástúrin, turmys-tirshiligin, tilin, dilin, dinin nasıhattaıtyndyǵyn da jaqsy bilemiz. Ótkizilip jatqan ujymdyq korporatıvterdi taldamaı-aq qoıaıyq. Degenmen, jańajyldyq sharalarda ysyrapshyldyq pen dańǵazalyq basym bolyp bara jatqany anyq», - dedi Á. Bektaev Úkimet basshysy Álıhan Smaıylovtyń atyna joldaǵan saýalynda.
Onyń paıymynsha, Táýelsiz Qazaqstanda Jańa jyldy atap ótýdiń erekshe ıdeologııalyq, áleýmettik negizin qalyptastyratyn ýaqyt keldi.
«Elimizde 3000 jyldyq tarıhy bar Naýryz meıramy tereń dástúrge ený kerek. Birikken Ulttar Uıymy Bas assambleıasynyń qararyna sáıkes, Halyqaralyq dáreje alǵan, al UNESCO-nyń sheshimimen adamzattyń materıaldyq emes mádenı mura tizimine engizilgen Naýryz meıramy – halqymyzdyń qanyna singen, janyna jaqyn, rýhyna laıyq mereke. El ishinde Naýryz – Ulystyń uly kúni, jyl basy, kún men túnniń teńelgen kúni dep aıtylady. Osy kúni babalarymyz aralaryna jik túsken adamdardy bir dastarhannan dám tattyryp, tabystyrǵan, jalǵyz jarym jandardy úılendirip, jeke otaý etken. Jetim-jesirlerdi jaqyn týystarynyń qaraýyna arnaıy mindettep tapsyrǵan. «Bul kúni Samarqannyń da kók tasy jibigen», - dep, nebir myqty baı-baǵlandar da eldiń jaǵdaıyn jasaýǵa, kómek kórsetýge umtylǵan. Dál osy kúnderi bulaqtardyń kózin ashyp, tal otyrǵyzyp, árkim óz aýlasy men úı-jaıyn tazalaǵan. Naýryz óte salysymen eginshiler egin egip, malshylar tól alýǵa kirisip, jyl basy qaınaǵan eńbekke ulasqan. ıAǵnı, Naýryz – halqymyzdyń naǵyz rýhanı jáne eńbek merekesi. Bul kún ejelden-aq yntymaq pen yrys meıramy. Prezıdentimiz aıtqandaı, Naýryz – jańarý men jańǵyrýdyń sımvolyna aınalýy tıis», - dedi senator.
Álı Bektaevtyń aıtýynsha, memleketimizde balabaqshadan bastap barlyq oqý oryndary men eńbek ujymdarynda, árbir otbasynda Naýryz merekesin dáripteıtin, dástúrge engizýge muryndyq bolatyn, ár azamattyń sanasyna sińdire biletin jalpyulttyq kontseptsııa qabyldaý kerek.
«Naýryz – kól-kósir dastarhan jasap, júzdegen kıiz úıler tigip, ysrapshyldyqqa jol beretin meıram emes, ıaǵnı ár otbasyna, ár aýylǵa, ár óńirge rýhanı nár beretin jańashyl merekege aınalýy kerek. Naýryzdyń tarıhyn, rýhanı qundylyǵyn, onyń ár dástúriniń sımvolıkalyq mánin, izgi amaldarynyń tárbıelik maǵynasyn, tatýlyq pen birliktiń negizin zertteıtin, qalyń buqaraǵa jetkizetin ǵylymı ortalyq qalyptastyrý mańyzdy. Ár jyldyń ekonomıkalyq, statıstıkalyq qorytyndysy aldaǵy aqpan-naýryz aılarynda shyǵatyndyǵyn eskere otyryp, Naýryz merekesiniń qarsańynda ótken jyldy qorytyndylap, eńbek ujymdary men eńbek ozattaryn marapattaý dástúrge aınalýy tıis. Tipti, naýryz aıy eńbek adamyn dáripteý aıy bolǵany durys. Sonymen qatar, mereke qarsańynda turmysy tómen otbasylardy áleýmettik qoldaýdy, múmkindigi shekteýli azamattarǵa kómektesýdi jalpy halyqtyq aktsııaǵa aınaldyrý qajet», - dedi depýtat.
Onyń paıymynsha, Naýryz meıramy qarsańynda balalardyń taýarlaryna jeńildikter jasaý qajet.