«Naýryz» turǵyn úı baǵdarlamasyna 3 myńnan astam ótinim tústi

<p>ASTANA. KAZINFORM &ndash; Turǵyn úı baǵdarlamasyna qatysýǵa ótinim bergender arasynda 24 pen 35 aralyǵyndaǵy jastar kósh bastap tur.</p>

«25 sáýirde «Naýryz» turǵyn úı baǵdarlamasyna «Baspana market» (otbasybank.kz) platformasy arqyly alǵash astanalyq áskerı azamat ótinim joldady. Ol 3 jyldan beri Otbasy bankindegi depozıtine turǵyn úı tólemderin jınaqtaýda, qazir otbasymen birge jaldamaly páterde turyp jatyr. Ótinimder qabyldaýdyń alǵashqy kúni Astana, Almaty, Shymkent, Aqtóbe men Mańǵystaý oblysynan kóp tústi», - dep habarlady Otbasy bankiniń baspasóz qyzmetinen.

Osy ýaqytqa deıin orta eseppen saǵatyna 400 ótinim qabyldanyp, óńdelgen. (Ótinim jumys kúnderi saǵat 9.00-den 21.00-ge deıin qabyldanady).

«Alǵashqy kúnniń qorytyndysy boıynsha barlyǵy 3 347 ótinim tústi. Turǵyn úıi bar jáne depozıtinde qajetti soma jınalmaǵan (1 mln teńge) azamattardyń ótinimi keri qaıtaryldy. Nátıjesinde 1 124 ótinim sátti qabyldandy, olardyń jartysy turǵyn úı kezeginde turǵan halyqtyń áleýmettik osal tobyna jatady», - delingen habarlamada.

Sondaı-aq, bankten salymshylar depozıtin asyqpaı tolyqtyryp, qajet bolǵan jaǵdaıda ony týystarynyń depozıtterimen biriktirip, baǵdarlamanyń sharttaryna saı ótinim berýge bolatyny aıtyldy.

«Ótinimderdi qabyldaý aıaqtalǵan soń saralaý bastalady. Baǵdarlamaǵa qatysýshylar tizimine eń kóp upaı jınaǵan úmitkerler kiredi. Qatysýshylardy dúrliktirmeý úshin ótinimderdi qabyldaý merzimi barynsha uzartyldy (25 sáýir - 30 maýsym). Taǵy bir jaıt, ótinim berý kúni men ýaqyty upaı sanaǵanda eskerilmeıdi», - dep túsindirilgen resmı aqparatta.

Aıta keteıik, keshe «Naýryz» turǵyn úı baǵdarlamasyna ótinim qabyldaý bastaldy.

Atalǵan baǵdarlamanyń talaptarymen tolyǵyraq silteme arqyly tanysýǵa bolady.