Naýqas paraǵy men anyqtama alý úshin emhanaǵa barýdyń qajeti joq – Baǵdat Mýsın

ASTANA. QazAqparat – Elektrondy úkimettegi «eDensaulyq» servısi turǵyndardyń birqatar sharýasyn jeńildetti. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Prezıdent densaýlyq saqtaý salasyndaǵy shashyrańqy júıelerdi retke keltirýdi tapsyrdy. Munda biz dárigerler men patsıentterdiń birqatar ózekti máselesin sheship jatyrmyz. EHealth jańa arhıtektýrasy dárigerlerdiń ártúrli júıelerde jumys isteý máselesin sheshedi, al turǵyndarǵa – medıtsınalyq uıymdarǵa júgingen barlyq jazbalar qoljetimdi bolady», - dedi Baǵdat Mýsın mınıstrliktiń keńeıtilgen alqa otyrysynda.

Sondaı-aq, bıyl eGovMobile mobıldi qosymshasynda «eDensaulyq» jańa servısi paıda boldy. Bul azamattardyń donorlyq mártebesi, elektrondy retsept, júkti áıelderdi esepke alý, aýrýhanaǵa jatqyzý jáne basqalary boıynsha aqparat jınaqtalǵan.

«Bul arqyly azamattar medıtsınalyq derekter men onlaın qyzmetterine jyldam qol jetkizedi. Jaqyn arada qaǵazbastylyqtan, naýqas paraǵy men anyqtama alý úshin medıtsınalyq uıymdarǵa barýdan bas tartamyz. Bolashaqta bul qyzmet keńeıtilip, barlyq qajetti málimettermen tolyqtyrylady», - dedi Baǵdat Mýsın.

Buǵan deıin Tsıfrlyq damý mınıstri bosanǵanǵa deıingi járdemaqyny alý merzimi 15 kúnnen bir saǵatqa qysqarǵanyn aıtqan edi.

Sondaı-aq, tótenshe jaǵdaı kezinde de ınterneti óshirilmeıtin uıymdardyń tizimi jasalady.