Naýqas bir kúnde 52 tisin emdetken: MÁMS aıasynda jalǵan dáriger qabyldaýyn jasaǵandar anyqtaldy

ASTANA. QazAqparat – Bıyl alǵashqy jartyjyldyqta MÁMS aıasynda 22 885 jalǵan jazba anyqtaldy. ıAǵnı, dárigerler naýqas em aldy dep kórsetedi, alaıda shyn máninde ol adam medıtsna mamanynyń qabyldaýyna ózi erkimen jazylmaǵan.

Bul týraly Ortalyq kommýnıkatsııalar qyzmetinde ótken brıfıngide Medıtsınalyq saqtandyrý qory tóraǵasynyń orynbasary Іlııas Muhamedjan málim etti, dep habarlaıdy QazAqparat tilshisi.

«2023 jyldyń 6 aıynda jalpy somasy 212,4 mln teńgege 22,9 myń jalǵan jazba anyqtaldy. Olardyń ishinde patsıentterge bir kúnde birneshe ret stomatologııalyq qyzmet kórsetý faktileri bar. Mysaly, bir naýqas bir kúnde 52 tisin emdetken. ıAǵnı, oryndaýshylar kórsetilgen qyzmetter sanyn kóbeıtip jaza bergen. Sol sııaqty 1 qyzmetker 1 600 myńnan astam massaj qyzmetin kórsetti dep jazylǵan. ıAǵnı, ol kúnine uzaqtyǵy 30 mınýttan 80 ret massaj jasap otyrǵan. Al eseptep qarasaq, bul úshin oǵan kúnine 40 saǵat úzilissiz jumys isteý kerek emespe?!», - dep anyqtalǵan olqylyqtarǵa toqtaldy Іlııas Muhamedjan.

Sondaı-aq ol aýrýhanada emdelip jatqan naýqastarǵa bir mezgilde emhanada dıagnostıkalyq qyzmet kórsetilgeni týraly faktiler anyqtalǵanyn atap ótti. Buǵan qosa, qaıtys bolǵan adamdardy tirkeý, marqumdarǵa dári-dármek taǵaıyndaý jaǵdaılary da áshkere bolǵan.