Náýbet jyldary qazaq halqynyń jartysyna jýyǵy qaza tapqanyn dáleldeıtin ǵylymı eńbek joq – depýtat

NUR-SULTAN. QazAqparat - Qazaq halqyna tán asharshylyqtyń óz deńgeıinde zerttelmeı jatyr. Bul týraly búgin elordada ótken «Qazaqstan: tarıhı taǵylym saıasaty» halyqaralyq online-konferentsııasynda aıtyldy, dep habarlaıdy QazAqparat tilshisi.

«Saıası qýǵyn-súrgin qurbandaryn eske alý 1997 jyldan beri bizdiń memleketimizde keshendi túrde júzege asyrylyp kele jatyr. Búgingi halyqaralyq konferentsııaǵa tek qana Qazaqstan ǵalymdary ǵana emes, TMD elderiniń jáne basqa da shetel ǵalymdary qatysýda. Biz árqashan tarıhtan sabaq alýymyz kerek. Tarıhymyzdyń jaqsy jaqtaryn ǵana emes, kóleńkeli jaqtaryn da zerdeleı bilsek – úlken maqsattarǵa jetetin joldy ashamyz», - deıdi QR Parlament Májilisiniń depýtaty Núrlan Dýlatbekov.

Onyń aıtýynsha, mundaı konferentsııa Semeı, Shymkent, Mańǵystaý, Qaraǵandyda ótken. Búgingi konferentsııa sonyń qorytyndysy deýge bolady.

«Saıası repressııa osy ýaqytqa deıin zerttelip keldi, biraq qazaq halqyna tán asharshylyqtyń óz deńgeıinde zerttelmeı jatqany meni tolǵandyrady. Sol náýbetten qazaq halqynyń jartysyna jýyǵy qaza tabýy bárimizdiń qabyrǵamyzdy qaıystyryp, júregimizdi aýyrtady. Osyny dáleldep, baǵa beretin ǵylymı eńbek, monografııa jazdyq pa? Osy baǵytta kóp jumys isteýimiz kerek. Qazirgi pandemıııa jaǵdaıyna qaramastan osy taqyrypty taǵy bir elep-ekshep, kórsetýimiz durys boldy dep oılaımyn», - deıdi ol.