«National Geographic Qazaqstan» jýrnalynyń ana tilimizde shyǵýy bıylǵy jyldyń eleýli oqıǵasy - D. Abaev (FOTO)

ASTANA. QazAqparat - «National Geographic Qazaqstan» jýrnalynyń ana tilimizde shyǵýy bıylǵy jyldyń eleýli oqıǵasy boldy. Ortalyq Azııa óńirinde tuńǵysh ret jaryq kórgen «National Geographic Qazaqstan» jýrnalynyń tusaýkeser rásimine arnalǵan shara barysynda Aqparat jáne kommýnıkatsııalar mınıstri Dáýren Abaev osylaı málim etti.

Eń aldymen mınıstr Qazaqstanda alǵash ret jaryq kórip otyrǵan álemdik basylymnyń qadamyna qutty bolsyn aıtty.

«Álemge tanymal basylymnyń Qazaqstanǵa kelip, qazaq tilinde shyǵýyn men bıylǵy jyldyń eleýli oqıǵasy dep bilemin. Bul bizdiń el úshin ǵana emes álemdik joba úshin de mańyzdy jańalyq. Halyqaralyq basylymnyń ǵylymı izdenisterge, qyzyqty derekterge toly tańdaýly maqalalaryn endi qalyń oqyrman qunarly qazaq tilinde oqıtyn boldy. Sonymen qatar, biz ózimizdiń eń úzdik tól materıaldarymyzdy aǵylshyn tiline aýdarý arqyly elimizdi dúnıe júzine tanytýdyń taǵy bir múmkindigine qol jetkizdik», - dedi mınıstr.

Eske sala keteıik, búgin «National Geographic Qazaqstan» jýrnalynyń resmı tusaýkeseri ótip, onyń aıasynda Astanadaǵy Qazaqstan Respýblıkasy Ulttyq mýzeıinde «National Geographic-tiń» úzdik 50 sýreti» atty fotokórmesi ashyldy.

Sharaǵa «National Geographic» halyqaralyq jýrnalynyń Vashıngtonnan kelgen basshylyǵy, sheteldik meımandar, Qazaqstan Respýblıkasy Parlamentiniń depýtattary, elimizdegi dıplomatııalyq korpýs ókilderi, ǵalymdar men zııaly qaýym, bıznes-qaýymdastyq músheleri, memlekettik organ qyzmetkerleri jáne t.b. qatysty.

«National Geographic» - álemdegi eń bedeldi qoǵamdyq ujymdardyń biri. Negizi HІH ǵasyrda qalanǵan brendtiń menshigine birqatar telearnalar, jýrnaldar, baspa úıleri kiredi. «National Geographic-tiń» búginde álem boıynsha 600 mıllıon aýdıtorııasy bar. 128 jylda qoǵam ǵylymı-zertteý jumystaryna 11 000 grant bóldi.