Natalıa Nagachevskaıa: Alǵys aıtý kúni – qazaqstandyqtar úshin biregeı mereke
Bul týraly QazAqparat jazady.
«Bul mereke elimizde turatyn etnostardyń birligin, yntymaǵy men dostyǵyn kórsetedi. Meniń atam men ájem, myńdaǵan polıaktar sııaqty, Qazaqstanǵa 1936 jyly qatygez stalındik rejım kesirinen jer aýdaryldy. Qazaqtar asharshylyqty bastan ótkergenderine qaramastan, olardy jaý retinde emes, janashyrlyqpen qarsy alyp, ózderinde de tapshy bolǵan nanmen bólisti.
Olar jyly Eýropadan kelgen adamdardy Azııanyń qatal da sheti men shegi joq dalasynda ómir súrýge úıretti. Bir-biriniń tilin bilmeý adamdardyń qarym-qatynasyna esh tosqaýyl bolmady. Adamdar úshin basty nárse – kúndelikti máselelerdi sheshýde ózara túsinistik pen yntymaqtastyq, janashyrlyq sezimi jáne qıyn ýaqytta kómekke kelý múmkindigi boldy. Mine, osyndaı meıirbandylyqtyń arqasynda polıaktar aman qaldy. Bizge repressııanyń aýyr jyldarynda kómek pen qoldaý kórsetkeni úshin rýhanı baı adamdarǵa alǵysyn urpaqtan-urpaqqa jetkizip otyrdy.
Olar kórshi bolyp, tatý-tátti, beıbit ómir súrdi, balalary men nemerelerin tárbıelep, kóp jumys istedi. Úlkenderge – qurmet, jastarǵa qoldaý kórsetip, qýanysh pen qaıǵyda da birge boldy. Biz bir-birimizden kóp nárse úırendik», – dedi ol.
N. Nagachevskaıanyń aıtýynsha, búgingi tańda biz erkin elde turamyz, biz úshin bar álem ashyq.
«Biz qazaqtarmen, káristermen, nemistermen, ıngýshtarmen jáne basqa da etnostarmen birge beıbit ómir súrip jatyrmyz. Balalarymyzdyń bolashaǵy – bizdiń táýelsiz Qazaqstandy birge quramyz.
Men – qazaq kelinimin. Kúıeýimiz ekeýmiz boıyna eki ulttyń eń jaqsy qasıetterin sińirgen eki ul tárbıelep otyrmyz. Qazaqtyń salt-dástúrleri men ádet-ǵuryptary ómirimniń ajyramas bóligine aınaldy. Al men bolsam, óz otbasyma qaıtalanbas polıak kolorıtin ákeldim.
Kúıeýimniń úlken tatý otbasy kópultty Qazaqstan halqyn beıneleıdi, óıtkeni onda ýkraındar, polıaktar jáne nemister de bar. Keremet mereke – Alǵys aıtý kúni qarsańynda men ata-anama, kúıeýime baqytty otbasy men ádemi balalarymyz úshin alǵys aıtqym keledi. Oblys turǵyndaryna qaıtalanbas jyly atmosfera úshin, Elbasymyz ben Prezıdentimizge Qazaqstandaǵy beıbitshilik pen kelisim úshin alǵysymdy bildiremin», - dep túıindedi Natalıa Nagachevskaıa.