Natalıa Godýnova: Mınıstrlikter jaýapkershilikti óńirlerge ysyra salýǵa beıim

ASTANA. QazAqparat – Mınıstrlikterdiń jaýapkershilikti óńirlerge ysyra salýǵa degen umtylysy anyq kórinedi. Bul týraly Májilistiń jalpy otyrysynda Joǵary aýdıtorlyq palatanyń tóraǵasy Natalıa Godýnova aıtty, dep habarlaıdy QazAqparat tilshisi.

«Óńirlik ózin-ózi qamtamasyz etý jáne el azamattaryna teń jaǵdaı men múmkindikterdi qamtamasyz etý qabileti ázirge iske asyrý satysynda. Jergilikti bıýdjetterdiń shyǵysyn óz kirisimen jabý múmkindigi - 6,5-84 paıyz aralyǵynda. Al olardyń damý deńgeıi men problemalarynyń aýqymy da ártúrli. Bul rette salyq salynatyn bazany keńeıtýge is júzinde yntalandyrý joq. Qoldanystaǵy bıýdjetaralyq qatynastar júıesiniń jetilmegeni kórinip tur. Bunyń barlyǵy áleýmettik jiktelý men ishki kóshi-qonnyń qubylýyn kúsheıtip, damýshy qalalardyń ınfraqurylymyna aıtarlyqtaı aýyrtpalyq túsiredi», - dedi Natalıa Godýnova.

Onyń atap ótýinshe, ortalyq memlekettik organdar óńirlerdegi jetekshilik etetin baǵyttardy jetkilikti deńgeıde úılestirmeıdi.

Josparlaý jáne oryndaý jergilikti atqarýshy organdarǵa berilgen.

«Mınıstrlikterdiń jaýapkershilikti óńirlerge ysyra salýǵa degen umtylysy anyq kórinedi. Tek bıyldyń ózinde 2 trln teńgeden astam qarajat jalpy sıpattaǵy transfert bazasyna berildi. Al 2022 jyly olardyń oryndalýy kóp suraq týǵyzdy. Endi olar Joǵary aýdıtorlyq palatanyń baqylaýynan múldem tys qaldy. Bul rette taıaýdaǵy úsh jylda sýbventsııa kólemi 3 ese óspek», - dedi palata tóraǵasy.