Naryqty syltaý etkender qazaq tilinde oqıtyn oqyrmandardyń quqyǵyn buzyp otyr - Q. Sultanov

ASTANA. 13 naýryz. QazAqparat - Naryqtyq júıeni syltaý etkender qazaq tilinde oqıtyn oqyrmandardyń quqyǵyn buzyp otyr. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Qýanysh Sultanov osy máseleni kóterdi.

«Ótken 2012 jyly birneshe aı boıy volonterlardyń járdemimen anyqtaǵanymyz: Astana jáne Almaty qalalaryndaǵy iri saýda oryndarynda, ortalyq kóshelerdegi, áýejaı, temir jol vokzaly, avtobýs turaqtary men aıaldamalary sııaqty halyq kóp shoǵyrlanǵan jerlerdegi gazet-jýrnal kıoskileriniń kóbinde memlekettik tildegi basylymdar satylmaıdy. Keıbir kıoskiler qazaq tilindegi basylymdardy satýǵa múddeli emestigin ashyq aıtyp, olardy satylymǵa qabyldamaıdy. Ekinshiden, kıoskilerde «Egemen Qazaqstan» jáne «Kazahstanskaıa pravda» sııaqty qoǵamdyq áleýmettik, úkimettik baǵyttaǵy gazetter satylmaıdy. Bireýleri «Bizge berilmeıdi» dese, endi bireýleri «resmı gazetterdi el almaıdy» degen oıdan shyǵarylǵan qajetsizdikti kóldeneń tartady. Úshinshiden, esesine kıoskilerdiń basym kópshiligi sheteldiń beımálim basylymdarymen toltyrylǵan, kıoski satýshylary olardy tıimdi jáne kózge jaǵymdy kórsetýge tyrysady. Ári, olardyń bul talpynystary nátıjesiz de emes. «Nelikten qazaq gazetteri joq?» degen suraqqa «olardy eshkim almaıdy, suranys az», nemese «bizge qazaq basylymdary berilmeıdi» degen negizsiz ýáj aıtady», - deıdi Q. Sultanov.

Onyń aıtýyna qaraǵanda, elimizde tirkelgen 2 783 basylymnyń 574-i ǵana qazaq tilinde. Qazaqstandaǵy kıoskiler arqyly buqaraǵa reseılik 1025 gazet-jýrnal, ıaǵnı bizdiń memlekettik tilimizde shyǵatyn baspa ónimderinen eki ese artyq ónimder taratylady. «Jáne olardyń basym kópshiligi bizdiń bolmysymyzǵa múldem jat basylymdar ekenin eshkimge dáleldep jatýdyń qajeti de bola qoımas. Olarmen shart jasasqan «QazPress», «Qazposhta» basylymdardyń mazmunyna qarap jatqan joq», - deıdi Q. Sultanov.

Depýtattyń paıymynsha, naryqtyq júıeni syltaý etkender qazaq tilinde oqıtyn oqyrmandardyń quqyǵyn buzyp otyr. «Kópshiliktiń «nege Qazaqstannyń kıoskilerinde qazaq tilindegi basylymdar satylmaıdy?» - degen suraǵyna naqty jaýap ta joq. Mundaı kórinister Elbasy Nursultan Nazarbaevtyń «Qazaqstan damýynyń 2050 jylǵy strategııasynda» memlekettik tildiń bolashaqtaǵy mártebesine aıryqsha ekpin berip, el aldyna uly mindet qoıǵanyna qalaı sáıkes kelmek? BAQ-nyń bólshek saýdasymen shuǵyldanatyn «QazPress», «Qazposhta» degen qurylymdar ony tek bıznes kózine aınaldyryp, qoǵamdyq sanaǵa óz yqpalyn osylaısha júrgize bermek pe?», -deıdi depýtat Qýanysh Sultanuly.