Naryq teńgedegi uzaq merzimdi depozıtterdiń mólsherlemelerine túzetý engizdi

ALMATY. QazAqparat – Qazaqstannyń depozıtterge kepildik berý qory teńgelik depozıtter boıynsha 2020 jyldyń qarasha aıyna usynylatyn eń joǵary syıaqy mólsherlemelerin bekitkendigin málim etti, dep habarlaıdy QazAqparat tilshisi.

Qazan aıyna arnalǵan mólsherlemelermen salystyrǵanda shekti mólsherlemelerge qatysty ózgerister uzaq merzimdi depozıtter boıynsha oryn aldy. Bul mólsherlemeler naryqtaǵy ózeristerge baılanysty esepteledi, ıaǵnı olardyń joǵarylýyn nemese tómendeýin bank sektory qalyptastyrady.

«12 jáne 24 aıǵa shaqtalǵan merzimdi depozıtter boıynsha naryqtyq mólsherlemelerdiń tómendeýi nátıjesinde olar boıynsha shekti mólsherlemeler sáıkesinshe 0,4 jáne 0,1 paıyzdy tarmaqqa azaıdy. Tómendeýge qatysty bul úrdis bankterdiń dál osy depozıtterge degen qyzyǵýshylyǵynyń tómendigin kórsetedi. Óıtkeni jınaq depozıttermen salystyrǵanda olardyń utqyrlyǵy joǵary», – dep habarlady qordyń baspasóz qyzmeti.

Ulttyq valıýtadaǵy basqa depozıtter boıynsha usynylatyn eń joǵary syıaqy mólsherlemeleri burynǵy deńgeıinde qaldy.