Narynqolda 6 oqýshyny kólik qaqty: Bir bala áli reanımatsııada

<p>Almaty oblysynyń Narynqol aýylynda jol apatynan zardap shekken balalardyń jaǵdaıy belgili boldy. Bul týraly Óńirlik kommýnıkatsııalar ortalyǵynda ótken baspasóz máslıhatynda oblystyq Densaýlyq saqtaý basqarmasy basshysynyń orynbasary Leıla Serikbaeva aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">QazAqparat tilshisi.</a></p>

«21 qyrkúıek kúni bolǵan oqıǵa saldarynan aýyr jaraqat alǵan oqýshylar aldymen, Narynqoldaǵy aýdandyq aýrýhanaǵa jetkizildi. Oblystaǵy dárigerler shuǵyl túrde konsılıým ótkizip, naqty emdeý sharalaryn júrgizip, balalardyń háli bir qalypqa kelgennen keıin oblystyq aýrýhanaǵa aýystyrdy», – dedi Leıla Serikbaeva.

Spıkerdiń sózinshe, búginde oblystyq aýrhanada bes bala jatyr. Onyń bireýi jansaqtaý bóliminde, tórteýi travmotologııa bólimshesinde em qabyldaýda. Qazirgi tańda naýqastardyń beti beri qaraǵan.

«Balalardyń alǵan jaraqaty aýyr boldy. Aıaq-qol súıekteri synǵan. Aýdandyq aýrýhana dárigerleriniń arqasynda alǵashqy kómek kórsetilip, naýqastar birtindep oblystyq aýrýhanaǵa jetkizildi. Ota jasalyp, súıekteri qalpyna keltirildi. Emdeý sharalary tolyqtaı júrgizilip jatyr. Aldaǵy ýaqytta, aman-saý úılerine shyǵarylady degen úmittemiz», –deıdi Almaty oblystyq balalar klınıkalyq aýrýhanasynyń dırektor orynbasary Asqar Qalıev.

Eske salaıyq 21 qyrkúıek kúni Almaty oblysynyń Narynqol aýylynda «Subaru» kóligin tizgindegen 15 jastaǵy jasóspirim 6 oqýshyny qaǵyp ketken bolatyn. Bir bala medıtsınalyq tekserýden ótkennen keıin ambýlatorlyq emdeýge jiberildi.

Belgili bolǵandaı jasóspirim aǵasynyń kóligin ruqsatsyz aıdap áketip, dúkenge barmaq bolǵan.