Nárestege qatysty oqıǵadan keıin Atyraý oblysy perzenthanasynyń basshysy jumystan ketpek
Janar Sádýovanyń aıtýynsha, ótken aptada oblystyq perınataldyq ortalyqta jas bosanǵan ana sábıdi edenge qulatyp alǵan. Osyǵan baılanysty oblystyq densaýlyq saqtaý basqarmasy arnaıy komıssııa quryp, tekserý júrgizdi. Tekserý qorytyndysymen patsıentterdi táýlik boıy baqylaýǵa mindetti medıtsına qyzmetkerleri men kezekshi dárigerlerge tártiptik shara qoldanylǵan.
«Bıylǵy 8 maýsymda K. esimdi áıel salmaǵy 4 keli 450 gramm ul balany dúnıege ákeldi. Ol bosanǵannan keıin ana men bala birge jatatyn bólimde bolǵan. Bosanǵan áıel 9 maýsymda rentgen kabınetine josparly túrde flıýorografııaǵa jiberildi. Osy kezde K.-nyń balasy palatada qalǵan. Palatada jańa bosanǵan ózge áıel jylaǵan náresteni jubatý úshin ony qolyna alǵan. Biraq dene tepe-teńdigin joǵaltyp, shaqalaqty qulatyp alǵan. Sol kúni bala ÝDZ men kompıýterlik tomografııaǵa túsirildi. Travmatologtar men nevropatologtar keńesin berdi. Qatty jaraqaty bolmaǵanmen, gıpoksııaly ıshemııa jaraqaty anyqtalyp, emdeý taǵaıyndaldy. Jańa týǵan náreste jansaqtaý bólimine aýystyryldy. Qazir sábı nárestelerdiń patologııalyq bóliminde jatyr. Onyń jaǵdaıy qanaǵattanarlyq», - deıdi Janar Sádýova.
Onyń aıtýyna qaraǵanda, perınataldyq ortalyqtaǵy palatalarda dabyl túımesi bar. Patsıentter sol túıme arqyly medıtsına qyzmetkerlerin shaqyra alady. Bul týraly aldyn ala eskertilgen.
«Palatada balaǵa anasynyń ózi qaraıdy. Biraq, anasy palatadan shyǵyp ketkende, medıtsına qyzmetkerleri náresteni baqylaýy qajet edi. Ásirese, bosanǵan áıelder ózderin nashar sezingende, medıtsına qyzmetkerleri olardyń janynda bolyp, kómek berýi tıis», -deıdi basqarma basshysynyń orynbasary.
Osyndaı oqıǵadan soń oblystyq perınataldyq ortalyqtyń dırektory óz erkimen jumystan ketý týraly aryzyn bergen. Aryzdy oblystyq densaýlyq saqtaý basqarmasynyń basshylyǵy qarap jatyr.
Eske salaıyq, buǵan deıin Atyraý perzenthanasynda jas bosanǵan ana ózge áıeldiń sábıin edenge qulatyp alǵanyn habarlaǵan bolatynbyz.