Náreste kindiginen qan alyp, óskeninde emge paıdalaný jobasy zerttelip jatyr

<p>AQTÓBE. KAZINFORM &ndash; Bilim, ǵylym jáne tájirıbeni qatar alyp júrý úshin Aqtóbedegi medıtsına ýnıversıteti birneshe zertteý jumysyn qolǵa alǵan. Koronavırýs ınfektsııasynan keıingi asqynýlar, onkologııalyq aýrýdy erte anyqtaý, hromnyń aǵzaǵa áseri sekildi birqatar baǵytta ǵylymı jobalar bar. Sonymen birge álem kóz tigip otyrǵan jasýsha tehnologııasy, ıaǵnı sábıdiń kindiginen qan alyp, keıin óskende dertinen aıyqtyrý úshin qoldaný jobasy da zerttele bastady. Bul týraly Marat Ospanov atyndaǵy Batys Qazaqstan medıtsına ýnıversıtetiniń rektory Áset Qalıev Kazinform tilshisine aıtyp berdi.</p>

«Birinshiden, ýnıversıtettiń ózi ǵylymı jobalardy qoldaıdy. Ekinshiden, Ǵylym jáne joǵary bilim mınıstrligi grant beredi. Byltyr tórt grant utyp aldyq. Bul jerde negizinen ekologııalyq máseleler, onyń ishinde hromnyń aǵzaǵa zııany zerttelip jatyr. Sonymen birge koronavırýs ınfektsııasynan keıingi asqynýlar, onkologııalyq aýrýlardy erte anyqtaý baǵyttary qamtyldy. Qazir ǵylymmen aınalysamyn degen jastar úshin 22 stýdenttik úıirme jumys istep tur. Stýdentterdiń bir ilimdi tereń meńgerýi úshin kitaphana jasaqtalǵan. Onda 600 myńnyń astam kitap qory bar. Ózim de ǵylymmen aınalysamyn», - deıdi Áset Qalıev.

Atap aıtqanda, qazir jasýsha tehnologııasy, ıaǵnı álem qyzyǵyp otyrǵan saladaǵy jobalar qolǵa alynǵan.

«Jańa týǵan sábıdiń kindiginen qan alyp, qatyryp, óskende belgili bir aýrý paıda bolsa, sol jasýshany egý arqyly baýyrdy ósirip, uıqy bezin qalpyna keltirýge bolady. Zertteýdi Irannan kelgen Amın Tamodonmen birge bastap, jyl sońyna deıin belgili bir nátıjege jetkimiz keledi», - deıdi.

Áset Qalıev medıtsınanyń tájirıbege negizdelgen sala ekeni eskerilýi qajettigin aıtady, ıaǵnı teorııa men praktıka qatar júrýi kerek. Osy rette ózi de aýrýhana hırýrgııasynan qol úzbeı, ota jasap júr.

«Stýdentter birinshi kýrstan bastap-aq alǵashqy medıtsınalyq kómek kórsetý, emhanaǵa kelgen naýqastardy qabyldap, olardy tirkeý, ıne shanshý, tamyrǵa ıne salý sekildi jumystardy meńgeredi. Sodan keıingi kýrstarda jaýapkershilik te arta túsedi. Máselen, bizge úsh klınıka, atap aıtar bolsaq, stomatologııa, onkologııalyq ortalyq pen otbasylyq emhana básekege qabiletti, bilikti maman daıyndaýda septigin tıgizip otyr. Bilim, tájirıbe, ǵylym úshtigi birlesip, suranysqa ıe kadr daıyndaýǵa múmkindik beredi. Sonymen birge BQO, Atyraý, Mańǵystaýdaǵy úlken klınıkalardyń bári bizdiń oqý-tájirıbe bazamyz bolyp esepteledi. Internder qajetti praktıkadan sol jerde ótedi. Osyndaǵy onkologııalyq ortalyqty ǵylymı ıntegratsııalanǵan akademııalyq ortalyqqa aınaldyrǵymyz keledi. Aldaǵy ýaqytta Aqyldy operatsııa ortalyǵyn ashsaq degen oı bar. Sonda stýdentter qashyqtan otyryp, otanyń qalaı júrip jatqanyn kóre alady», - deıdi Áset Qalıev.