Nankın-2014:Bolashaq juldyzdarymyzdyń jolyn ashqan Olımpıada
Bul jetistik - jerlesterimizdiń jasóspirimder arasyndaǵy Jazǵy Olımpıada oıyndaryndaǵy jańa kórsetkishi. Olaı deıtinimiz bul tórt jyl buryn bolǵan kórsetkishke qaraǵanda, eki medalǵa artyq. 2010 jyly tuńǵysh ret Sıngapýr¬de ótken jasóspirimder arasyndaǵy Olımpıada oıyndarynda Qazaqstan quramasy alty medal (2 altyn, 2 kúmis, 2 qola) oljalap, jalpy komandalyq esepte 24- orynǵa turaqtaǵan edi. Osyǵan deıin habarlaǵanymyzdaı Nankınde jarystyń alǵashqy kúni dzıýdodan 55 keli salmaqta el namysyn qorǵaǵan sańlaǵymyz Baýyrjan Jaýyntaev Qazaqstan qorjynyna alǵashqy altyn medaldi salǵan bolatyn. Al ekinshi bas júldeni altyn judyryqty baýyrymyz Abylaıhan Júsipov jeńip aldy. 60 kelide fınalǵa deıin súrinbeı jetken jerlesimiz sheshýshi synda da shyn sheber ekenin dáleldedi. Júsipov fınalda kýbalyq Alaın Lımontamen kezdesip, 2:1 esebimen jeńiske jetti. Birinshi raýndtan bastap shabýylda óner kórsetý júıesin ustanǵan jerlesimiz belsendi qımyldady. Qarsylasyna soqqylary dóp tıdire bildi. Alaıda ekinshi raýndta kýbalyq boksshy da osal emes ekenin tanytty. Qatarynan siltegen birneshe soqqysy qarsylas enshisine upaı jazdy. Úshinshi raýndta qorǵanysty da basa nazarǵa alyp, urymtal tusyn kútken Abylaıhan qarsylasynan aılasyn asyryp ketti. Esterińizge sala keteıik, Abylaıhanǵa jasóspirimder arasyndaǵy ІІ Jazǵy Olımpıada oıyndarynda Qazaqstan týyn ustap shyǵýdy senip tapsyrylǵan bolatyn. Mine, jas boksshymyz sol arqalap barǵan úmitti aqtap, qasqaıyp týymyzdy kóterip shyǵyp, Aspan asty elinde ánuranymyzdy áýelete shyrqatyp qaıtty. Jeńis tuǵyrynyń eń bıik satysyna kóterilgen úshinshi jerlesimiz -erkin kúresten el namysyn qorǵaǵan Muhambet Qýatbek. Ol 54 keli salmaqta baq synap, óziniń teńdessiz myqtylyǵyn álem aldynda pash etti. Fınalda Muhambet amerıkalyq Daton Fıksti jeńdi. Alǵashqy mınýttardan aılasyn asyrýǵa tyrysqan ol birinshi kezeńde alty upaıǵa ıe boldy. Amerıkalyq sportshy da upaı aıyrmasyn qysqartýǵa umtyldy. Alaıda, qazaqtyń qaısar ulyna shamasy jetpedi. Osylaısha Muhambet Qýatbek Qazaqstan qorjynyna úshinshi altyn júldeni syılady. Qazaqstan qorjynyna túsken jalǵyz kúmis júldeni 81 kelide judyryqtasqan otandasymyz Vadım Kazakov jeńip aldy. Ol shırek fınalda norvegııalyq Vegar Tregendi aıamaı soqqynyń astyna aldy. Kezdesý barysynda Kazakovtyń qarsylasynyń qabaǵy jarylyp, birneshe ret dárigerler kómegine júgindi. Al Narek Manasıanmen ótken jartylaı fınaldyq kezdesý Kazakov úshin qıyn boldy. Degenmen, asa tartysty ótken match bizdiń jigittiń paıdasyna sheshildi. Esep: - 2:1. Biraq Vadım Kazakov fınalda bolgarııalyq qarsylasy Blago Naıdanovtan utylyp, kúmis júldeni qanaǵat tutty. Osylaısha, Qazaqstan boksshylary Nankınnen bir altyn, bir kúmis aldy. Endi qorjynymyzǵa qola medal salǵan sańlaqtarymyzǵa toqtalyp ótsek. Alǵashqy qola medalǵa 77 keli salmaqta synǵa túsken aýyr atletshimiz Jasulan Qalıev qol jetkizdi. Ol julqa kóterýde úsh múmkindigin de paıdalanyp, 139 kelini baǵyndyrdy. Al serpe kóterýde de úsh múmkindigin múlt jibermeı, 171 kelini erkin baǵyndyrdy. Qossaıys qorytyndysy boıynsha 310 kelini kótergen qazaq sportshysy úshinshi orynǵa taban tiredi. Altyndy armenııalyq Nakob Mkrtchıan (319 kg), kúmisti úndistandyq Rahýl Ragala (316 kg) ıelendi. Jerlesimiz chempıonnan 9 keli kem kóterdi. Ekinshi qola medalǵa aýyr atletıkadan synǵa túsken arýlarymyzdyń biri qol jetkizdi. Oǵan 63 kelide baq synaǵan Tatıana Kapýstına ıe boldy. Kapýstına qossaıys qorytyndysy boıynsha 228 (julqa kóterýde - 105, serpe kóterýde - 123) kelini baǵyndyrdy. Kúmis alǵan reseılik Svetlana Cherbakova da 128 kelini kótergen. Biraq onyń salmaǵy Kapýstınadan az bolyp, kúmis medal reseıiliktiń qanjyǵasyna baılandy. Altyndy 244 kelini erkin kótergen taılandtyq Chaıdı Dýangansorn ıelendi. Sondaı-aq, ziltemirshilerimiz arasynan 69 kelide baq synaǵan Makeev júldeli orynǵa bir taban jetpeı qalǵanyn da aıta ketýimiz kerek. Ol qola júldeni ıelenýge barynsha talpynyp kórdi. Julqa kóterýden 125 kelini baǵyndyrsa, serpe kóterýden 153 kelini baǵyndyryp, 4-orynǵa taban tiredi . Sonymen qatar aýyr atletıkadan synǵa túsken arýlarymyzdan 58 kelide synǵa túsken Altynaı Dámen de júldeli orynǵa bir taban jaqyndap, qarsylastaryna ese jiberip aldy. Onyń kórsetkishi 5- oryn. Úshinshi qola júldeni el qorjynyna grek-rım kúresinen synǵa túsken Evgenıı Polıvadov saldy. 69 kelide beldesken balýanymyz egıpettik jáne ózbekstandyq qarsylastaryn alyp uryp, jartylaı fınalda ázerbaıjandyq Islambek Dadovqa ese jiberip aldy. Qola júlde úshin ótken tartysta Evgenıı Germanııadan kelgen Karen Mosebahtan basym tústi. Nátıjesinde otandasymyz 3- qola júldeni ıelendi. Al 58 kelide baq synaǵan Raıymbek Qurmanǵalı besinshi oryndy ıelendi. Tórtinshi qola júldege, jarystyń sońǵy kúni óner kórsetken gımnasshy búldirshin qyzdarymyz qol jetkizdi. Olar jarystyń toptyq jattyǵýlarynda úshinshi orynǵa ıe boldy. Qyzdarymyzdyń kórsetkishi - 25,050 upaı. Aıta keteıik, irikteý kezinde elimizdiń gımnasshy qyzdary tórtinshi orynda bolǵan. Alaıda fınalda olar Ózbekstan, Kanada, Egıpet quramasyn basyp ozyp, qola júldeni julyp aldy. Ámına Qojahmet, Álııa Moldahmetova, Vıktorııa Gýslıakova, Darıa Medvedeva jáne Nuraı Qumarova bastaǵan búldirshin qyzdarymyz tórtinshi qola medaldi jeńip alyp, jasóspirimder arasyndaǵy Olımpıada tarıhynda alǵash ret jeńis tuǵyryna kóterildi. Saıystyń bul túrinen birinshi orynda - Reseı, ekinshi oryndy Bolgarııa qyzdary ıelendi. Mine, osylaısha Qazaqstan quramasy Nankındegi olımpıadada úsh altyn, bir kúmis, tórt qola medal ıelenip, jalpy esepte 21-orynǵa taban tiredi. Búgin Nankınde jasóspirimder arasyndaǵy ІІ jazǵy Olımpıada oıyndaryn jabylý saltanaty ótedi. Esterińizge sala keteıik, jalpy, Qytaıdyń Nankın qalasynda jasóspirimder arasyndaǵy ІІ jazǵy Olımpıada oıyndarynda 14 pen 18 jas arasyndaǵy 3800 jasóspirim sportshy baǵyn synady. Negizinen jasóspirimder arasyndaǵy Olımpıada oıyndarynda jekeleı syndaǵy sport túrlerinde ár elge bes joldamadan artyq berilmeıdi. Atalmysh dodada elimizdiń namysyn 21 sport túrinen 51 sportshy qorǵady. Al 2010 jyly Sıngapýrde ótken jasóspirimder arasyndaǵy І jazǵy Olımpıada oıyndarynda elimizdiń atynan 47 sportshy baryp, 20 sport túrinen synǵa túsken bolatyn. Qazaqstan sportshylary óner kórsetken sport túrleri men joldamalar sany tómendegideı: Boks - 4 joldama (4 múmkindikten); Kúres túrleri - 4 joldama (5 múmkindikten);Aýyr atletıka - 4 joldama (múmkindikten); Júzý sporty - 3 joldama; Velosport - 2 joldama; Qazirgi bessaıys - 2 joldama; Ústel tennısi - 2 joldama; Sadaq tartý - 1 joldama; Nysana kózdeý - 1 joldama;
Eń kóp medal jınaǵan memleketter:
Orny
Elder
Altyn
Kúmis
Qola
barlyǵy
1
Qytaı
38
13
14
65
2
Reseı
27
19
11
57
3
AQSh
10
5
7
22
4
Frantsııa
8
3
9
20
5
Japonııa
7
9
5
21
6
Ýkraına
7
8
8
23
7
Italııa
7
8
6
21
8
Vengrııa
6
6
11
23
9
Brazılııa
6
6
1
13
10
Ázirbaıjan
5
6
1
12
11
Ulybrıtanııa
5
5
10
20
12
Polsha
5
0
1
6
13
O. Koreıa
4
6
5
15
14
Aýstralııa
4
3
14
21
15
Belarýs
4
3
0
7
16
Taıpeı
3
3
2
8
16
Efıopııa
3
3
2
8
18
Lıtva
3
2
2
7
19
Taıland
3
2
3
8
20
S. Koreıa
3
2
0
5
21
Qazaqstan
3
1
4
8
Kúnsultan OTARBAI