Namazxanalarda dáret alatyn jer mindetti túrde bolýy qajet - mınıstr Ermekbaev

ASTANA. QazAqparat - QR Din isteri jáne azamattyq qoǵam mınıstri Nurlan Ermekbaevtyń aıtýynsha, qoǵamdyq oryndarda namazxanalardy ashýǵa áli ruqsat resmı túrde berilgen joq. Al ol ruqsat engizilgende namazxanalar sanıtarlyq-epıdemıologııalyq talaptarǵa saı bolýy shart, xabarlaıdy QazAqparat tilshisi.

«Áýejaılarda, temirjol jáne avtovokzaldarda namazxanalardy ashý týraly tyıymdy endi ǵana alyp tastaıyn dep otyr. Biraq resmı túrde ony áli alyp tastaǵan joq. Tyıymdy alyp tastaǵannan keıin ol nysandardyń ıeleri ózderi sheshim qabyldaıtyn bolady. Biz olarǵa qysym kórsete almaımyz. Ózderi sheshse, qarjy jaǵdaılary jetse, ózderi múddeli bolsa, namazxanany asha alady. Sosyn namazxana belgili talaptarǵa (sanıtarlyq-epıdemıologııalyq - avt.) saı bolýy qajet», - dedi Ermekbaev QazAqparat tilshisine bergen suxbatynda. Al «Namazxanada dáret alatyn jer mindetti túrde bolýy qajet pe?» degen suraqqa mınıstr: «Mindetti túrde bolýy kerek», - dep jaýap berdi.

Aıta keteıik, jaqynda QR Din isteri jáne azamattyq qoǵam mınıstrligi ǵıbadat etý bólmeleri (namazhana) men dinı ádebıetter satatyn kitap dúkenderine qoıylatyn talaptardy qaıta qarap shyǵyp, ǵıbadat etý úıleri men dinı ádebıetter satylatyn úı-jaılardyń ornalasýyna arnalǵan nusqaýlyqtyń jańa redaktsııasyn ázirlegenin málimdedi. «Nusqaýlyqtaǵy túbegeıli jańalyq retinde osyndaı úı-jaılardyń memlekettik uıymdar men mekemelerden 300 metrden kem emes qashyqtyqta ornalasýyna qoıylǵan burynǵy tyıym kúshiniń joıylǵanyn aıta ketý kerek. Mundaı talap búgingi eldi mekenderdiń ornalasý erekshelikterine jaýap bere almaıdy. Nusqaýlyqtyń jańa redaktsııasynda temir jol jáne avtovokzaldarda, áýejaılar men porttarda, ıaǵnı adamdar eriksiz túrde uzaq ýaqyt bolatyn oryndarda dinı is-sharalardy ótkizýge arnalǵan úı-jaılardy ashýǵa qoıylǵan tyıym alynyp tastaldy », - delingen xabarlamada.