Namazxanalar qoǵamdyq oryndarda qaıta ashylady

ASTANA. QazAqparat - QR Din isteri jáne azamattyq qoǵam mınıstrligi ǵıbadat etý bólmeleri (namazhana) men dinı ádebıetter satatyn kitap dúkenderine qoıylatyn talaptardy qaıta qarap shyqty, dep xabarlaıdy QazAqparat tilshisi Din isteri komıtetine silteme jasap.

Resmı málimetke sáıkes, komıtet dindar azamattar men sarapshy mamandardyń oı-pikirlerin eskere otyryp, ǵıbadat etý úıleri men dinı ádebıetter satylatyn úı-jaılardyń ornalasýyna arnalǵan nusqaýlyqtyń jańa redaktsııasyn ázirledi.

"Nusqaýlyqtaǵy túbegeıli jańalyq retinde osyndaı úı-jaılardyń memlekettik uıymdar men mekemelerden 300 metrden kem emes qashyqtyqta ornalasýyna qoıylǵan burynǵy tyıym kúshiniń joıylǵanyn aıta ketý kerek.

Mundaı talap búgingi eldi mekenderdiń ornalasý erekshelikterine jaýap bere almaıdy. Nusqaýlyqtyń jańa redaktsııasynda temir jol jáne avtovokzaldarda, áýejaılar men porttarda, ıaǵnı adamdar eriksiz túrde uzaq ýaqyt bolatyn oryndarda dinı is-sharalardy ótkizýge arnalǵan úı-jaılardy ashýǵa qoıylǵan tyıym alynyp tastaldy", - delingen xabarlamada.

Alaıda 300 metr boıynsha shekteýler bilim berý mekemelerine qatysty kúshinde qaldy. Atalǵan talap rýhanı (dinı) bilim berý uıymdaryna qatysty qoldanylmaıdy. Osy rette, ǵıbadat etý bólmelerin ashý kezinde belgili bir talaptardy saqtaý qajettigin erekshe atap ótken jón. Mysaly, dinı is-sharalardy ótkizýge arnalǵan úı-jaılar dáret alý úshin qajetti sanıtarlyq torappen qamtamasyz etilýi tıis jáne jalpy alǵanda Qazaqstan Respýblıkasynyń qoldanystaǵy zańnamasyna sáıkes sanıtarlyq-epıdemıologııalyq talaptarǵa saı bolýy shart. Atalǵan talaptar ǵıbadat etý rásimderin oryndaý kezinde qolaıly jaǵdaılardy qamtamasyz etý maqsatynda engizilip otyr.

"Nusqaýlyq jobasynda qoldanystaǵy zańnamaǵa sáıkes nysannyń menshik ıesiniń  úı-jaıdaǵy sanıtarlyq, órt jáne basqa qaýipsizdikter úshin jaýap beretindigi kórsetilgen. Tıisti normatıvtik qujat kelisý protsesinen ótken soń ǵıbadat etý bólmeleri, sonyń ishinde namazhanalar, jańa jaǵdaıda jumys isteıtin bolady. Dindarlar úshin mundaı úı-jaılarda ǵıbadat etý rásimderi qaýipsiz jáne barynsha qolaıly jaǵdaılarda oryndaý múmkindikterimen qamtamasyz etiletin bolady. Jalpy alǵanda, ǵıbadat etý bólmelerin ashý týraly sheshim osy nysandardyń menshik ıeleri tarapynan qabyldanatyn bolady", - deıdi mamandar.