Naqty sektordyń kóp salalary turaqty ósimdi kórsetti - Áset Erǵalıev

NUR-SULTAN. QazAqparat – Jyldyq ınflıatsııa 7 paıyzǵa deıin baıaýlady. Bul týraly Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Bıylǵy birinshi toqsannyń qorytyndysy boıynsha makroekonomıkalyq kórsetkishterdiń jaqsarǵany baıqalýda. Ken óndirý ónerkásibin esepke almaǵanda, naqty sektorda ósý 7,9%-ǵa deıin jedeldedi, al negizgi kapıtalǵa ınvestıtsııalar 34% deńgeıde ósti. Jyldyq ınflıatsııa 7 paıyzǵa deıin baıaýlady», - dedi mınıstr Úkimet otyrysynda bıylǵy qańtar-naýryzdaǵy qorytyndylardy baıandaı kele.

Onyń aıtýynsha, naqty sektordyń kóp salalary turaqty ósýdi kórsetti. Olar qurylys, sýmen jabdyqtaý, óńdeý ónerkásibi, elektrmen jabdyqtaý jáne aýyl sharýashylyǵy salalary. Sonymen qatar, aqparat pen baılanys salasynda 9,9%-ǵa ósý baıqaldy.

«Nátıjesinde, jalpy ishki ónimniń ósý qarqyny osy jylǵy qańtar-aqpandaǵy mınýs 2,9 paıyzdan qańtar-naýryzda mınýs 1,6 paıyzǵa deıin jaqsardy. Óńdeý ónerkásibi salalarynda ósý qarqynynyń jedeldeýi baıqalady. Serpindi ósý mashına jasaýda 21,8 paıyzǵa, onyń ishinde avtomobıl qurastyrýda 20,7 paıyzǵa ósti», - dedi Á. Erǵalıev.

Onyń sózine qaraǵanda, qurylys materıaldary óndirisi – 30,1 paıyzǵa, hımııalyq ónimder óndirisi – 14,2 paıyzǵa, plastmassa ónimderi óndirisi – 22,3 paıyzǵa, kıim óndirisi – 25,8 paıyzǵa, jıhaz óndirisi – 19,2 paıyzǵa, farmatsevtıka 9,1 paıyzǵa ósti.

Óńdeý ónerkásibinde ósýdiń joǵarylaý úrdisi saqtalyp otyr. Ósý 7,5 paıyzdy qurady.