Naıl Nurov Ýnıversıadadaǵy birneshe sport saıystarynyń nege keıinge shegerilgendigin túsindirdi

ALMATY. QazAqparat - Ýnıversıada-2017-ge daıyndalý jáne ótkizý dırektsııasynyń basshysy Naıl Nurov stýdentter oıynyndaǵy birneshe sport jarystarynyń keıinge shegerilýine oraı túsiniń berdi, dep habarlaıdy «QazAqparat» HAA tilshisi.

Onyń aıtýynsha, búgin tańerteń «Shymbulaq» taý shańǵysy kesheninde 50 sm-den astam qar jaýyp, kórý múmkinshiligi 5-700 metr aralyǵynda boldy.

«Ókinishke oraı, keıbir jarystardy ýaqtyly ótkizýge aýa raıy múmkindik bermedi. Áıelder arasyndaǵy kross erteńge qaldyryldy. Snoýbord saıysy eki saǵatqa keshigip bastaldy. Odan bólek, qossaıys, shańǵy jarysy men tuǵyrdan shańǵymen sekirý básekeleri keıinge shegerildi. Búgingi aýa raıy qolaısyz boldy. Sondyqtan, «Alataý» shańǵy-bıatlon kesheninde bıatlonshylar men shańǵyshylar jarysy eki saǵatqa keshigip bastaldy, osyǵan oraı, uıymdastyrý komıteti qossaıysty erteńge aýystyrdy», - dep túsindirdi ol.

Sınoptıkterdiń málimetine súıensek, jaqyn kúnderi qar jaýady dep kútilýde. Ýnıversıadanyń uıymdastyrý komıteti tabıǵat qubylystaryn esepke alyp, kez kelgen jaǵdaıǵa saqadaı saı otyr.

«Búgingi aýa raıyna boıymyz úırendi, erteń barlyǵymyzǵa ońaı bolady dep oılaımyn. Osyndaı jaısyz aýa raıynda bıatlonnan alǵashqy «altynymyzǵa» qol jetkizdik. Match kez kelgen aýa raıynda ótkiziledi. Qazir biz qandaı da bir jarysty toqtatýdy qarastyrmaımyz», - dep aıtty Dırektsııanyń basshysy. 

Ol birde bir sportshynyń aýa raıyna jáne jarystyń keıinge shegerilýine qatysty shaǵym jasamaǵandyǵyn atap ótti.

Naıl Nurov keıinge qaldyrylǵan oıyndardyń jarystar kestesine ornalastyrylýy týraly pikir bildirdi. «Sporttyń barlyq túri boıynsha qosymsha taǵy bir kún bar, ıaǵnı jarysty ótkizýge múmkindik bar degen sóz. Eger qosymsha berilgen kúni de saıys ótpese, arnaıy reglamentke sáıkes ony qaıta qaraımyz», - dep málimdedi ol.