Naǵyz qazaq - Dombyra: Elordada Ulttyq Dombyra kúni qalaı ótýde

NUR-SULTAN. QazAqparat - Búgin elimizdiń basty alańy elordadaǵy "Qazaq eli" monýmenti alańy qazaqtyń qara dombyrasynan tógilgen kúıge bólendi. Myńǵa jýyq dombyrashy túrli mýzykalyq aspaptardyń súıemeldeýimen "Balbyraýyn", "Adaı", "Saryarqa", "Álqıssa"kúılerin oryndap, jınalǵan kórermenniń qulaq quryshyn qandyrdy. Bul jyl saıyn shilde aıynyń alǵashqy jeksenbisimen tuspa-tus keletin Ulttyq Dombyra kúnine arnalǵan merekelik kontsert edi. QazAqparat osy sharany sýretter tilimen oqyrman nazaryna usynady.

Merekelik kontsertten aqparat taratý maqsatynda "Qazaq eli" alańyna saǵat 11-den óte jetkenimizde shara ótetin jerge aǵylǵan qalyń dombyrashy men jurtshylyqqa kýá boldy. Sahna tórinde dombyradan kúı tógiltetin adamdar ústilerine oıýmen bezendirilip, "Ulttyq Dombyra" kúni degen jazýy bar fýtbolka, bastaryna kepki kıip alǵan. Ár jerde dombyradan kúı tógiltip, ázil áńgimege erik bergen jastardyń da qarasy qalyń.

Saǵat 11-30-da dombyrashylar sahna tórine jaıǵasyp, jınalǵan qaýymdy bir-eki kúımen sýsyndatty. Osydan keıin merekelik kontserttiń basty qonaǵyn kútip, siltideı tyndy.

Mártebeli meıman da kóp kúttirgen joq. Saǵat tili 12-ge 10 mınýt qalǵanda QR Prezıdenti Ákimshiliginiń basshysy Qyrymbek Kósherbaev pen Nur-Sultan ákimi Altaı Kólginovti ertken Memleket basshysy jurtshylyqtyń qoshemetimen arnaıy tigilgen shatyr astyndaǵy orynǵa bet aldy.

Batyrlarymyzǵa rýh, aqyndarymyzǵa shabyt bergen kúmbirlegen dombyranyń úninen tógilgen birneshe kúıdi tyńdaǵannan keıin Memleket basshysy Qasym-Jomart Toqaev quttyqtaý sózin sóıledi.

Dombyra árbir qazaqtyń rýhyn kókke kóteretin qundy qazynamyz bola berýi tıis

Mektepte dombyra úırený sabaǵyn engizý qajet.

Dombyra búkil Qazaqstan halqyn biriktiretin teńdesi joq mádenı mura.

Dombyra Ulttyq kúnine oraı ótip jatqan sharaǵa mádenıet, sport salasynyń elimizge esimi tanymal tulǵalarynyń da basym kópshiligi kelgen. Máselen, bokstan Olımpıada chempıony Ermahan Ibraıymov qazaqtyń qara dombyrasy sportshylarymyzdy rýhtandyryp, sharshy alańda jeńiske jeteleıtindigin aıtady.

"Dombyra oınaǵan kezde kúsh alyp, sharshy alańǵa senimmen shyǵamyz. Kúni keshe ǵana qazaqtyń qara dombyrasynan tógilgen áýendi estip, odan qýat alyp, sharshy alańǵa kóterilgen Qanat Islam qarsylasyn alǵashqy raýndta-aq nokaýtqa jiberdi. Mine bul - dombyranyń qudireti", - dedi Ermahan Ibraıymov.

Al qazaq kompozıtory, kúıshi, dombyrashy Seken Turysbekov Ulttyq Dombyra kúnin 1 kúnniń aıasynda emes, árbir óńirde jeke-jeke ótkizse jón bolar edi degen oıyn bildiredi.

"Jalpy, Ulttyq Dombyra kúni dep shildeniń alǵashqy demalysyn emes bir kúndi naqtylap belgileý qajet sııaqty. Buǵan qosa, mynadaı ystyq kúnge emes, qońyr-salqyn kóktem ne kúz aılarynda ótkizse degen ótinishimiz bar", - dedi tanymal kúıshi.

Aıta keterligi, Ulttyq Dombyra kúni "Qazaq eli" alańynda bastalyp, Esil ózeniniń jaǵasyndaǵy Amfıteatrda «Naǵyz qazaq - dombyra» kontsertimen jalǵasady. Sahna tórinde Qazaq orkestri, Nur-Sultan qalasy ákimdigi memlekettik akademııalyq fılarmonııasynyń solısteri men vokalısteri óner kórsetedi. Kontserttiń bastalýy - saǵat 18.00-de. Kirý - tegin.