Nıý-Iorkte koronavırýsqa baılanysty tótenshe jaǵdaı engizildi

NUR-SULTAN. QazAqparat -Dúnıejúzilik densaýlyq saqtaý uıymy koronavırýstyń qazirgi ýaqytta 90-nan astam elge jaıylǵanyn habarlady. Vırýs juqtyrýdyń jańa derekteri Serbııa, Slovakııa, Vatıkan, Paragvaı, Perý, Kamerýn jáne Togoda tirkeldi. Al Nıý-Iork tótenshe jaǵdaı jarııalady, dep habarlaıdy QazAqparat VVS-ge silteme jasap.

Nıý-Iork gýbernatory Endrıý Kýomo sońǵy táýlikte koronavırýs juqtyrǵandar sanynyń 2 esege jýyq artyp ketýine baılanysty shtatta tótenshe jaǵdaı rejimin jarııa etti. Jalpy, bul shtatta vırýs juqtyrýdyń 89 deregi tirkelgen.

Baspasóz máslıhatynda sóz sóılegen gýbernator sońǵy kúnderi shtattyń medıtsınalyq bıligi vırýstyń bar-joǵyn anyqtaý úshin «agressıvti» tekserý júrgizgendigin atap ótti. Buǵan deıin aldyn alý sharasy retinde ondaǵan adam májbúrli túrde karantınge jatqyzylǵan bolatyn.

«Jappaı karatınge jatqyzý ınfektsııanyń taralýyn baıaýlatýdyń úzdik tásili ekendigine eshqandaı kúmán joq», - dep atap ótedi Endrıý Kýomo.

Aıta keteıik, qazirgi ýaqytta búkil álemde koronavırýs juqtyrǵan adamdardyń sany 105 myńnan asyp ketti. Onyń 24 myńy Qytaıdan tysqary aýmaqta tirkelip otyr. Osy ýaqytqa deıin álemde koronavırýstan 3 400-den astam adam kóz jumsa, onyń shamamen 3100-i Qytaıda tirkelgen.