Nıý-Iorkte komendanttyq saǵat alynyp tastaldy

NUR-SULTAN. QazAqparat - Nıý-Iork meri Bıll de Blazıo jeksenbi kúni merzimi bitken komendanttyq saǵatty sozbaýǵa sheshim qabyldady, dep habarlaıdy QazAqparat.

Bul týraly Bıll de Blazıo óziniń Twitter-degi paraqshasynda jazdy.

«Nıý-Iork: biz komendanttyq saǵatty alyp tastaımyz, sheshim shuǵyl kúshine enedi. Keshe jáne túnde qalada jaǵdaıdyń túzelgendigi baıqaldy», - dep jazdy ol.

Nıý-Iork shtatynyń bıligi 8 maýsymnan bastap koronavırýs pandemııasyna baılanysty shekteýdi alyp tastaýdy josparlaǵan.

CNN telekompanııasynyń derekterine qaraǵanda, keshe túnde megapolıýstegi demonstratsııa kezinde 10 adam, al senbige qaraǵan túni 270 adam ustalǵan.

Eske sala ketsek, bılik komendanttyq saǵatty AQSh-tyń shamamen 40 qalasynda engizgen edi.