Nıý-Iorkte Qazaqstannyń BUU-men yntymaqtastyǵy máseleleri talqylandy
Bas hatshynyń orynbasary Qazaqstanǵa teńizge shyǵa almaıtyn damýshy elder toby aıasyndaǵy respýblıkamyzdyń belsendi qyzmeti úshin alǵys bildirdi.
Syrtqy saıası vedomstvosynyń basshysy BUU ókilin teńizge shyǵa almaıtyn damýshy elder tobynda 2020 jylǵy 1 qańtarda bastalatyn aldaǵy tóraǵalyq etý aıasyndaǵy Qazaqstannyń jumys basymdyqtary týraly habardar etti. Teńizge shyǵa almaıtyn eń iri memleket retinde bizdiń elimiz Ornyqty damý maqsattaryna qol jetkizý úshin osy topta kóshbasshy bolýǵa nıetti.
Taraptar Qazaqstan bastamashylyq jasaǵan teńizge shyǵa almaıtyn damýshy elder úshin 2004-2014 jyldarǵa arnalǵan Almaty is-qımyl baǵdarlamasy jáne 2014-2024 jyldarǵa arnalǵan Vena is-qımyl baǵdarlamasynyń halyqaralyq yntymaqtastyqqa eleýli úlesin atap ótti.
Qazaqstan SІM basshysy M. Tileýberdi BUU Bas Hatshysynyń Orynbasary - Lańkestikke qarsy basqarmasynyń basshysy (LQB) Vladımır Voronkovpen kelissózder ótkizdi.
Mınıstr suhbattasyn Qazaqstannyń terrorızmge qarsy is-qımyldarymen tanystyrdy. Qazaqstan tarapy QR Tuńǵysh Prezıdenti - Elbasy Nursultan Nazarbaevtyń bastamasymen Terrorızmnen azat álemge qol jetkizý úshin minez-qulyq kodeksin alǵa jyljytqany úshin LQB-nyń kórsetken qoldaýyna rızashylyǵyn bildirdi. Búgingi tańda Kodekske 84 memleket qosyldy jáne Qazaqstan ony ámbebaptandyrý jónindegi jumysty jalǵastyrady.
BUU ókili Qazaqstannyń qaýipsizdik pen turaqty damýdy qamtamasyz etýdegi kúsh-jigerin joǵary baǵalady, sondaı-aq LQB-men belsendi yntymaqtastyǵy úshin alǵysyn bildirdi. QR azamattaryn qaqtyǵystar aımaqtardan qaıtarǵan «Jýsan» operatsııasyn ótkizý boıynsha jemisti jumys atalyp ótti, bul álemniń kóptegen elderi úshin úlgi bola alady.
Taraptar BUU qamqorlyǵymen joǵaryda atalǵan operatsııa týraly derekti fılm túsirý jáne lańkestikke qarsy kúreske elderdi shaqyratyn arnaıy PR-kampanııany iske asyrý týraly ýaǵdalastyqqa qol jetkizdi.